Janubiy Koreya futbolining eng mashhur va tajribali yulduzlaridan biri — Son Hyon Min yaqin orada Yevropaga qaytishi mumkin.
Fichajes nashri yozishicha, Ispaniyaning mashhur klubi «Barselona» 32 yoshli hujumchini qishki transfer oynasida ijaraga olish imkonini ko‘rib chiqmoqda. Kataloniyaliklar hujum chizig‘ini kuchaytirish maqsadida aynan Sonni o‘z tarkibiga qo‘shib olishni rejalashtirgan.
Manbalarning ma’lum qilishicha, Sonning hozirgi jamoasi — AQSHning «Los Anjeles» klubi bilan tuzilgan shartnomasida maxsus band mavjud bo‘lib, unga ko‘ra futbolchi qisqa muddatga Yevropa jamoalarida ijara asosida o‘ynash huquqiga ega. «Barselona» esa ushbu bandni faollashtirish orqali tajribali hujumchini o‘z safiga jalb etmoqchi.
Son Hyon Min bu mavsumda MLS (Amerika Meyjor Liga Sokker) musobaqalarida juda samarali o‘yin ko‘rsatmoqda. U 10 ta o‘yinda maydonga tushib, 9 ta gol urgan va 2 ta golli uzatma amalga oshirgan. Bu ko‘rsatkich u hali ham yuqori formada ekanini isbotlaydi.
«Barselona» uchun bu transfer muhim ahamiyatga ega bo‘lishi mumkin, chunki klub hozirgi mavsumda hujumda ayrim muammolarga duch kelmoqda. Murabbiylar shtabi Sonning tajribasi va tezkorligi orqali yosh futbolchilar uchun ham katta maktab bo‘ladi, deb hisoblamoqda.
Janubiy koreyalik forvardning «Los Anjeles» bilan amaldagi shartnomasi 2027-yil oxirigacha amal qiladi. Transfermarkt ma’lumotlariga ko‘ra, hujumchining bozor qiymati 20 million yevro deb baholanmoqda.
Son Hyon Min Yevropaga qaytishi holatida u Premer-ligadagi mashhur yillaridan so‘ng yangi sahifani ochishi mumkin. Uning tajribasi va ishtiyoqi «Barselona» uchun kerakli energiya bo‘lishi ehtimoldan xoli emas.
Kataloniyalik muxlislar esa bu xabarni qiziqish bilan qarshi olmoqda — chunki Son Hyon Minning universal o‘yin uslubi va mehnatsevarligi uni nafaqat Koreya, balki butun jahon futbolida sevimli figuraga aylantirgan.
“Zamin”ni Telegramʻda oʻqing!
