Qatarda o‘tkazilayotgan 17 yoshgacha bo‘lgan futbolchilar o‘rtasidagi Jahon chempionatida yurtimiz o‘smirlar terma jamoasi musobaqadagi ilk bahsini Paragvay yoshlariga qarshi o‘tkazmoqda. Ushbu muhim bellashuvda Islom Ismoilov shogirdlari birinchi bo‘lib hisobni ochishga muvaffaq bo‘lishdi.
Uchrashuvning 25-daqiqasida Azizbek Abdumo‘minov Abubakir Shukurullayev uzatgan aniq pasni ishonchli golga aylantirdi va shunday qilib O‘zbekiston jamoasi 1:0 hisobida oldinga chiqdi.
Birinchi taymning 35-daqiqasiga kelib, o‘smirlarimiz ustunlikni saqlab qolishmoqda. Jamoa qattiq intizom va jangovor ruh bilan harakat qilmoqda. Shu bois Paragvay o‘yinchilariga tezkor hujumlar orqali katta bosim o‘tkazish imkoni berilmayapti.
Bellashuv Qatardagi "Espayr" akademiyasining 1-stadionida bo‘lib o‘tmoqda. U yerdagi muhit va ob-havo sharoiti o‘smirlarimiz uchun qulay bo‘lmoqda.
O‘zbekiston jamoasi tarkibida Ne’matulloh Rustamjonov darvozani qo‘riqlamoqda, himoyada Muhammad Hakimov va Mo‘minxon Bahodirxonov faol harakat qilmoqda. Hujum chizig‘ida esa Abubakir Shukurullayev va Azizbek Erimbetov raqib himoyasi uchun jiddiy xavf tug‘dirmoqda.
O‘zbekiston U-17ning bu o‘yindagi harakati muxlislar uchun umidbaxsh manzara yaratdi. Agar o‘smirlarimiz shunday ruhda davom etsa, musobaqadagi ilk g‘alaba ham uzoq emas.
“Zamin”ni Telegramʻda oʻqing!
