O‘zbekiston terma jamoasi safida Al Ayn shahrida o‘tayotgan «Al Ayn Xalqaro Kubogi-2025» musobaqasida harakat qilayotgan hujumchi Igor Sergeev yakunga yetgan va kutilayotgan bellashuvlar haqida o‘z fikrlarini baham ko‘rdi. Uning ta’kidlashicha, musobaqa kichik formatda bo‘lsa-da, raqiblar darajasi jiddiy va har bir o‘yinda maksimal g‘ayrat talab qilinadi.
Sergeevning aytishicha, ikki o‘yindan tashkil topgan bu mini-turnir jamoa uchun muhim tajriba bo‘lib xizmat qilmoqda. «Musobaqa katta emas, ammo raqiblar juda kuchli. Misrni yengganimiz — mehnatning natijasi. Endi oldimizda yana Eron turibdi. Ishonchim komil, o‘ta keskin, raqobatli bahs bo‘ladi. Raqibning zaif joylarini izlaymiz, kurashamiz, barimiz bir maqsad — g‘alaba uchun», — deydi u.
Futbolchi Misrga qarshi o‘yinni ham alohida esladi. Uning ta’kidlashicha, o‘yin boshida urilish bilan erishilgan gol jamoaga katta ishonch berdi. «Birinchi taymdayoq hisobni ochishimiz bizga quvvat bo‘ldi. Keyin murabbiy hujumni kamaytira borib, himoyani mustahkamlashni tanladi — bu to‘liq mantiqiy qaror. Hisobni saqlab qolishimiz kerak edi, yigitlar ham buni yaxshi tushunib turishgan edi», — deya ta’kidladi Sergeev.
Suhbat davomida u jahon chempionati haqida ham qisqa fikr bildirdi. Uning aytishicha, hozir asosiy e’tibor — jamoaning to‘g‘ri ritmda tayyorgarlik olishi va har bir o‘yinda bor kuchini ishga solishi. «JCH-2026 haqida o‘ylayotganim yo‘q. Bir tomondan dunyo darajasidagi jamoalarga qarshi o‘ynashni istayman, lekin boshqa tarafdan guruhimizda raqobat yurakbo‘g‘ar darajada kuchli bo‘lishini ham istamayman. Ko‘ramiz, qur’a nimani taqdim etadi. Jismoniy jihatdan tayyor bo‘lamiz, ruhiy tomondan ham o‘zimizni yig‘ib olamiz. Eng muhimi — imkoniyat berilsa, bor kuchimizni ishga solamiz», — dedi hujumchi.
Eronga qarshi final — murabbiyning ushbu jamoaga qarshi ilk rasmiy sinovi bo‘ladi. Sergeevning o‘zi va butun jamoa g‘alaba uchun borini berishga tayyor ekani aytib o‘tildi. Muxlislar esa navbatdagi keskin to‘qnashuvdan yuqori kayfiyat va ta’sirli o‘yin kutishmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
