2026 yilgi FIFA Jahon chempionatiga tayyorgarlik qizg‘in davom etar ekan, musobaqaga bo‘lgan qiziqish butun dunyo bo‘ylab juda tez yoyilmoqda. FIFAning rasmiy ma’lumotiga ko‘ra, musobaqa uchun chiqarilgan dastlabki ikki millionta chipta allaqachon sotilib bo‘ldi. Bu holat JCH-2026ni tarixdagi eng ommaviy va eng inklyuziv chempionat sifatida yana bir bor tasdiqlamoqda.
Ma’lum qilinishicha, chiptalarni 200 dan ortiq davlat va hududdan kelgan futbol ishqibozlari xarid qilgan. Dunyo bo‘ylab millionlab muxlislar musobaqaning yanada ulkan ko‘lamda, yangi formatda o‘tishi va 48 ta terma jamoa ishtirok etishi tufayli bu chempionatni o‘z ko‘zlari bilan ko‘rishga harakat qilmoqda.
Dastlabki sotuvlar davomida eng ko‘p chipta sotib olganlar orasida tabiiyki, mezbon mamlakatlar — Kanada, Meksika va AQSH ishqibozlari peshqadamlik qildi. Ushbu davlatlarda o‘yinlar soni ham ko‘p bo‘lgani bois, mahalliy fanatlar o‘z stadionlarida o‘tkaziladigan o‘yinlar uchun imkoniyatni yutqazib qo‘ymaslikka harakat qilmoqda.
FIFA navbatdagi sotuv bosqichi qur’a tashlash marosimidan so‘ng — 11 dekabr kuni boshlanishini ma’lum qildi. Bu bosqichda chiptalar FIFA.com/tickets orqali qayta sotuvga chiqariladi va katta ehtimol bilan yana bir bor rekord darajada talab kuzatiladi.
2026 yilgi Jahon chempionati futbol tarixida yangi sahifa ochishi kutilyapti. Musobaqa ilk bor uch mamlakat — AQSH, Kanada va Meksikada birgalikda o‘tkaziladi. Muxlislar orasidagi shiddatli qiziqish esa bu olamshumul tadbirga bo‘lgan ishonch va shavqning juda baland ekanini ko‘rsatmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
