Yevropa futbolida yana qizg‘in transfer harakatlari boshlanmoqda. Italiyaning ikki yirik grandi — “Milan” va “Yuventus” jamoalari “Manchester Siti”ning tajribali yarim himoyachisi Bernardu Silvani o‘z safiga qo‘shib olish niyatida ekani ma’lum qilindi.
Ma’lumotlarga qaraganda, portugaliyalik futbolchining shartnomasi yozda o‘z nihoyasiga yetadi va “rossonerilar” hamda turinliklar erkin agent sifatida u bilan shartnoma imzolab olish imkoniyatini qo‘ldan chiqarmoqchi emas.
Manbalar ta’kidlashicha, “shaharliklar” shahar libosini uzoq yillar yorqin o‘yinlar bilan sharaflab kelgan Bernardu bilan shartnomani uzaytirish masalasida hozircha qiziqish bildirmayapti. Bu esa Silvaning karerasini Italiyada davom ettirishi ehtimolini yanada kuchaytirmoqda.
31 yoshli mahoratli xavbek 2017-yil yozidan buyon “Siti” sharafini himoya qilib keladi va shu vaqt davomida jamoa bilan birgalikda 6 marta Angliya Premer-ligasida zafar quchdi. U nafaqat gol va assistlari, balki universal o‘yin uslubi, mushtarak taktik fikrlashi bilan ham murabbiylar uchun qimmatli kadr hisoblanadi.
Endilikda Bernardoning navbatdagi manzili qaysi klub bo‘lishi barcha muxlislarni qiziqtirmoqda. Italiya grandidagi yangi sayohat portugal yulduzi uchun yana bir yangi bosqich bo‘lishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
