Ispaniya milliy jamoasi hamda Atletik Bilbao hujumkor yarimhimoyachisi Niko Uilyams kelasi mavsumdan boshlab faoliyatida jiddiy burilish qilish niyatida. Ispaniya matbuoti tarqatayotgan ma’lumotlarga ko‘ra, 23 yoshli futbolchi yozgi transfer oynasida Real Madrid safiga o‘tishni asosiy maqsad qilib olgan.
Xususan, Fichajes nashri yozishicha, Uilyams uchun Madrid varianti hozir eng ustuvor hisoblanadi. Avvalroq uni Barselona bilan bog‘lagan turli mish-mishlar paydo bo‘lgan edi, ammo hozirda bu yo‘nalish deyarli yopilgan. Sabab oddiy: kataloniyaliklar futbolchining transfer qiymatini to‘liq qoplash imkoniyatiga ega emas.
Transfermarkt portali Niko Uilyamsning bozor bahosini 60 million yevro atrofida belgilagan. Moliyaviy jihatdan qiynalayotgan «Barselona» uchun bunday summa hozircha og‘irlik qilayotgani aytiladi. Shu bois, futbolchining o‘zi ham realroq va barqaror variant sifatida Madrid klubini ko‘rib chiqmoqda.
Niko Uilyams 2021 yil yozidan beri «Atletik Bilbao» safida to‘p surib kelmoqda. U qisqa vaqt ichida jamoaning asosiy figuralaridan biriga aylanib, tezligi, driblingi va hujumdagi faolligi bilan muxlislar e’tiborini qozondi. Qizig‘i shundaki, futbolchining klub bilan amaldagi shartnomasi juda uzoq muddatga — 2035 yil yozigacha tuzilgan.
Shunga qaramay, yosh futbolchi kattaroq sahnaga chiqish, sovrinlar uchun muntazam kurashish va Yevropaning eng yuqori darajasida o‘zini sinab ko‘rishni istamoqda. Madridning «Real» klubi esa aynan shunday imkoniyatlarni taklif qila oladigan manzil sifatida qaralmoqda.
Yozgi transferlar oynasi yaqinlashar ekan, Niko Uilyams atrofidagi voqealar yanada qiziq tus olishi aniq. Muxlislar esa uning haqiqiy tanlovi rasman e’lon qilinishiga intiqlik bilan kutmoqda.
Mehmon guruhidagi foydalanuvchilar ushbu nashrga izoh qoldira olmaydi.
