Marokash terma jamoasi va «Real» vingeri Braim Dias Afrika Kubogi finalidagi og‘riqli mag‘lubiyatdan keyin ijtimoiy tarmoqlarda murojaat qilib, yurtdoshlari va terma jamoadagi sheriklaridan kechirim so‘radi. Uning so‘zlaridan shu narsa aniq sezildi: bu final faqat bir o‘yin emas, butun mamlakat umidi va u shu umid oldida o‘zini mas’ul deb hisoblayapti.
Dias o‘z murojaatida qalbi og‘riyotganini yashirmadi. U sovrinni qo‘lga kiritishni chin dildan orzu qilgani, muxlislarning mehri, har bir qo‘llab-quvvatlovi unga kuch berganini ta’kidladi. Shu bilan birga, u hal qiluvchi pallada yo‘l qo‘ygan xatosi uchun mas’uliyatni to‘liq o‘z zimmasiga oldi:
«Yuragim og‘riyapti… kecha xatoga yo‘l qo‘ydim va buning uchun to‘liq javobgarlikni zimmamga olaman. Samimiy uzr so‘rayman… bu yara tez bitmaydi, lekin harakat qilaman. O‘zim uchun emas, menga ishongan barcha insonlar uchun», — mazmundagi so‘zlar bilan Dias muxlislarga yuzlandi.
Finalning asosiy vaqti so‘nggi daqiqalarida Braim Dias penaltidan unumli foydalana olmadi. Shu vaziyatdan keyin o‘yin qo‘shimcha vaqtga o‘tib ketdi. Qo‘shimcha bo‘limlarda esa senegalliklar birgina gol urib, chempionlikni qo‘lga kiritdi. Marokash esa o‘z uyidagi finalda mag‘lub bo‘lib qoldi — bu albatta ikki karra og‘ir.
Eng ta’sirli jihatlardan biri: turnir davomida jamoani ko‘tarib kelgan, hatto musobaqaning eng yaxshi to‘purari sifatida «Oltin butsa»ni qo‘lga kiritgan Dias o‘yindan keyin ko‘zyoshlarini yashira olmadi. Futbolda ba’zan shunday bo‘ladi: bir tomonda sovrin, ikkinchi tomonda esa bir lahza — va sening yuragingdagi og‘irlik o‘sha lahzaga o‘ralib qoladi.
Biroq Dias murojaatida eng muhim nuqta — tushkunlikda “yo‘qolib ketish” emas, qayta turish haqida gapirdi. U kelajakda bu mehrga javob qaytarish, Marokash xalqi uchun yana faxr manbaiga aylanish niyati borligini aytdi. Muxlis uchun ham aynan shu ruh kerak: bugun og‘riydi, ertaga esa yana kurash boshlanadi.
“Zamin”ni Telegramʻda oʻqing!
