Foto Tengrinews.kz/Alixan Sariyev
2 fevral kuni Osiyo Olimpiya kengashi Osiyo Olimpiya kengashi 2029 yilgi qishki Osiyo o‘yinlari Olmaota shahrida o‘tkazilishini rasman ma’lum qildi. Bu haqda Sinxua agentligi xabar bergan.
Dastlab musobaqa Saudiya Arabistonida tashkil etilishi rejalashtirilgan, hatto qishki sportlar uchun kelajakda barpo etiladigan Trojena loyihasi asosiy maydon sifatida tilga olingan edi. Ammo yangi shahar va inshootlarni qurishga ko‘proq vaqt kerak bo‘lishi ma’lum bo‘lib, o‘tgan oy o‘yinlar noma’lum muddatga qoldirilgani e’lon qilingan.
Shu nuqtada Olmaota varianti amalda eng mantiqiy yo‘l bo‘lib chiqdi: shahar qishki sport muhitiga tayyor, tajriba bor, infratuzilma degan narsa ham “qog‘ozda emas, yerda” turibdi. Zero, Qozog‘iston 2011 yilda VII qishki Osiyo o‘yinlariga mezbonlik qilgan — musobaqalar Astana va Olmaotada, shuningdek atrof hududlarda bo‘lib o‘tgan.
Qisqasi, 2029 yilgi qishki Osiyo o‘yinlari uchun “tayyor maydon” tanlandi. Endi eng muhimi — tayyorgarlikni to‘g‘ri yo‘lga qo‘yish: logistika, xavfsizlik, arena va muxlislar servislari. Agar shu ishlar puxta qilinsa, Olmaota bu musobaqani yana bir bor yuqori saviyada o‘tkazib, mintaqa qishki sportiga yangi sur’at berishi mumkin.
“Zamin”ni Telegramʻda oʻqing!
