Italiya Kubogi chorak finalida «Yuventus»ning «Atalanta»ga qarshi bahsda 0:3 hisobida mag‘lub bo‘lishi turinliklar uchun og‘ir zarba bo‘ldi. Uchrashuvdan so‘ng jamoa bosh murabbiyi Luchano Spalletti natija sabablarini ochiq izohlab, hal qiluvchi daqiqalardagi mayda detallar katta farq qilib ketganini ta’kidladi.
Mutaxassisning aytishicha, o‘yinning eng muhim pallalarida raqib tomon o‘zini ancha ishonchli va “sovuqqon” tuta olgan. Spalletti «Atalanta»ni tabriklab, bu jamoa yaxshi shakllangani, tartibli va chiroyli futbol namoyish etishini alohida qayd etdi.
«0:3dan keyin ko‘p gapirish qiyin. Lekin haqiqat shu: hal qiluvchi vaziyatlarda ular bizdan to‘g‘riroq qaror qabul qildi», — degan mazmunda fikr bildirdi Spalletti.
Uning ta’kidlashicha, «Yuventus» ayniqsa keskin epizodlarda noto‘g‘ri yo‘l tutgan. Murabbiy statistika ba’zi payt muhim bo‘lishini tan olsa-da, xavfli vaziyatlarda eng asosiysi — tezlik va aniqlik ekanini eslatdi. Ana shu nuqtada jamoa xatoga yo‘l qo‘ygan, «Atalanta» esa imkoniyatdan to‘g‘ri foydalangan.
Spalletti ayrim epizodlarni misol qilib, jamoa ikki futbolchi bilan bir raqibni “yopish” imkoniga ega bo‘lgan holatlarda ham to‘pni burchak tomonga uzatib yuborganini aytdi. Uning fikricha, bunday qarorlarni to‘g‘ri anglash uchun ba’zan tajriba yetmaydi. Eng yomoni — hal qiluvchi daqiqalarda o‘tkirlik va fikr ravshanligi kamlik qilgan.
Shu bilan birga, murabbiy jamoani butun bir organizm deb his qilishini, taraqqiyot esa to‘liq mashg‘ulotlar va umumiy ish jarayoniga bog‘liq ekanini ta’kidladi. Uning so‘zlariga ko‘ra, imkoniyatlar soniga qaralsa, 0:3 natija mantiqan og‘ir ko‘rinishi mumkin, ammo aynan o‘sha hal qiluvchi daqiqalarda «Yuventus» o‘zini yo‘qotib qo‘ygan.
Eng ko‘p yoqmagan jihat sifatida Spalletti o‘yinning so‘nggi qismidagi tartibsizlikka urg‘u berdi. Uning ta’kidlashicha, jamoa bir paytdan keyin uyushqoqlikni yo‘qotib, vaziyatni yakkaharakat bilan o‘zgartirishga urinishni ko‘paytirgan. Natijada jamoaviy birlik pasaygan, maydondagi tizim “parchalangan”.
Penalti masalasiga kelsak, Spalletti bu yerda bahs qidirmadi: qo‘lga tegish bo‘lgani uchun penalti qo‘yilganini tan oldi va «mening ishim boshqa — men boshqa jihatlarga qarashim kerak», degan ruhda javob qaytardi.
Xulosa bitta: bu mag‘lubiyat «Yuventus» uchun katta saboq. Endi turinliklar uchun eng muhim vazifa — hal qiluvchi vaziyatlarda qaror qabul qilish tezligi, sovuqqonlik va jamoaviy tartibni yanada mustahkamlash. Chunki katta o‘yinlarda aynan shu mayda detallar taqdirni hal qiladi.
“Zamin”ni Telegramʻda oʻqing!
