Turkiya Superligasining 21-turida "Bashakshehir" safarda "Eyupspor"ni 2:1 hisobida yengdi. Uchrashuv Eyyup stadionida bo‘lib o‘tdi.
Bu bahs biz uchun alohida qiziq bo‘ldi: O‘zbekiston milliy jamoasining ikki vakili — Abbosbek Fayzullayev va Eldor Shomurodov asosiy tarkibda maydonga tushdi. Fayzullayev 65 daqiqa harakat qildi, Shomurodov esa o‘yinni oxirigacha olib bordi.
Hisob 14-daqiqada ochildi: Daviye Zelke gol urdi, assist esa Fayzullayev hisobiga yozildi. Shu paytdan keyin “Bashakshehir” o‘yinni “qo‘lida ushlab turdi” deyish mumkin: hujumda ham, to‘psiz holatda ham tartib bor, qarorlar tez, orqa chiziqda esa shoshilish kam.
Ikkinchi bo‘limda mehmonlar yana bir zarba berdi: 53-daqiqada Shomurodov o‘z imkoniyatidan unumli foydalanib, jamoasining ustunligini 2:0 ga chiqardi. Keyin “Eyupspor” oxirgi daqiqalarda bosimni oshirdi va 90+3 daqiqada Umut Bozoq bir gol bilan intriga yaratdi, lekin kech bo‘ldi — uch ochko “Bashakshehir” chemodaniga joylanib bo‘lgan edi.
Turkiya Superligasi. 21-tur
Eyupspor — Bashakshehir 1:2
Gollar: Bozoq 90+3 — Zelke 14, SHOMURODOV 53.
Bashakshehir — Shengezer, Shahiner, Duarte, Opoku, Operi (Qoratosh, 65), Kemen, Gunesh, FAYZULLAYEV (Brnich, 65), Harit, Zelke (Yildirim, 74), SHOMURODOV.
Bu g‘alaba “shaharliklar” uchun juda qimmat. Nuri Shahin jamoasi 33 ochko bilan 6-o‘rinda bormoqda, “Eyupspor” esa 18 ochko bilan 15-pog‘onada qoldi. Oldindagi turlarda “Bashakshehir” yuqori o‘rinlar uchun kurashni yanada qattiqlashtira oladi — bunda Shomurodovning gollari va Fayzullayevning yaratib berishi hal qiluvchi “vitamin” bo‘lib turibdi. Ha, raqiblar ham bila boshladi: bu ikkisi kayfiyatga qarab emas, natijaga qarab o‘ynaydi.
“Zamin”ni Telegramʻda oʻqing!
