Angliya Premer-ligasining 26-turida «Manchester Yunayted» safarda muhim ochkolardan ayrilib qoldi. Londonda «Vest Hem» maydoniga mehmon bo‘lgan Maykl Kerrik shogirdlari g‘alaba uchun kelgan bo‘lsa-da, bahs 1:1 hisobida durang bilan yakunlandi.
Uchrashuv ancha tortinchoq boshlandi: har ikki jamoa xavfsizlikni birinchi o‘ringa qo‘yib, shoshilmasdan o‘ynadi. «Vest Hem» o‘z uyidagi kayfiyatdan foydalanib, ko‘proq bosim qilishga urindi, «Yunayted» esa to‘pni nazorat qilib, vaziyatni aql bilan yechishga harakat qildi. Birinchi bo‘limda yirik imkoniyatlar ko‘p bo‘lmadi, lekin maydondagi kurash kayfiyatni qizdirib turdi.
Tanaffusdan keyin esa hisob ochildi. 50-daqiqada «bolg‘achilar»ning tajribali yarim himoyachisi Souchek imkoniyatni o‘tkazib yubormadi va London klubini oldinga olib chiqdi. Shu goldan keyin «Yunayted»da shoshilish kuchaydi: Kerrik jamoasi natijani o‘zgartirish uchun hujumga qattiqroq o‘tdi, almashinuvlar qildi, bosimni oshirdi. Ammo «Vest Hem» ham himoyada tish-tirnog‘i bilan turib, vaqtni o‘tkazishga, tempni tushirishga urinib bordi.
Hamma “xo‘p, shu bo‘ldi” degan paytda esa dramatik final keldi. 90+6-daqiqada zaxiradan tushgan Sheshko «Yunayted»ni mag‘lubiyatdan saqlab qoldi: u so‘nggi daqiqalardagi bosimni golga aylantirib, muvozanatni tikladi. Qisqasi, «MYU» bir ochkosini “oxirgi nafas”da qutqarib qoldi — Londondan quruq qo‘l bilan qaytmadi, lekin g‘alaba ham qo‘lga kirmadi.
Natijaga ko‘ra, «Vest Hem» ochkolarini 24 taga yetkazib, 18-pog‘onada qolmoqda. «Manchester Yunayted» esa 45 ochko bilan 4-o‘rinda turibdi. Chempionlik poygasi boshqa mavzular, lekin TOP-4 uchun kurashda har bir ochko oltin — ayniqsa shunday o‘yinlarda.
APL. 26-tur
Vest Hem – Manchester Yunayted 1:1
Gollar: Souchek 50 — Sheshko 90+6
Vest Hem – Hermansen, Van-Bissaka, Disasi, Mavropanos, Diuf, Souchek, Fernandes, Potts, Sammervill (Traore, 90), Boeun, Tati (Uilson, 69).
Manchester Yunayted – Lammens, Shou, Maynu, Dalot (Zirkzee, 82), Maguayr (Yoro, 69), Martines, Fernandesh, Amad, Kazemiro, Kunya (Sheshko, 69), Mbeumo.
Ogohlantirishlar: Fernandes 70 – Dalot 57.
Endi Kerrik jamoasi uchun asosiy vazifa oddiy: bunday “o‘chib-yonish”li finallarni doimiy ssenariyga aylantirmay, o‘yinni ertaroq hal qilish. Chunki har safar 90+ da “qutqaruv rejimi” yoqilaversa, nerv ham, ochko ham tez tugaydi.
“Zamin”ni Telegramʻda oʻqing!
