Angliya Premyer-ligasining 29-turida kutilmagan natija qayd etildi. Londonning "Tottenxem" klubi o‘z maydonida "Kristal Pelas"ni qabul qilib, 1:3 hisobida mag‘lubiyatga uchradi. O‘yin mezbonlar uchun yaxshi boshlangan bo‘lsa-da, uchrashuvdagi qizil kartochka vaziyatni tubdan o‘zgartirib yubordi.
Uchrashuvning 34-daqiqasida Dominik Solanke hisobni ochib, "shporlar"ni oldinga olib chiqqan edi. Biroq, 38-daqiqada himoyachi Micky van de Venning "oxirgi umid foli" uchun maydondan chetlatilishi o‘yin taqdirini hal qildi. Bir kishi kam bo‘lib qolgan mezbonlar himoyasi raqib bosimiga dosh bera olmadi. Ismaila Sarr penaltidan va bo‘lim so‘ngida gol urib dubl qayd etgan bo‘lsa, Jorgen Strand Larsen ham o‘z hisobiga gol yozdirib qo‘ydi.
Ismaila Sarr 8.3 reyting bilan uchrashuvning eng yaxshi futbolchisi deb topildi. Mehmonlar birinchi bo‘limning o‘zidayoq o‘yin tizginini to‘liq o‘z qo‘llariga olishdi. "Tottenxem" bosh murabbiyi ikkinchi bo‘limda Richarlison kabi futbolchilarni maydonga tushirib, vaziyatni o‘nglashga uringan bo‘lsa-da, hisob o‘zgarmadi. Ushbu g‘alaba "Kristal Pelas" uchun juda muhim ahamiyat kasb etdi.
“Zamin”ni Telegramʻda oʻqing!
