MMA olamida yilning eng intizorlik bilan kutilayotgan to‘qnashuvlaridan biriga soatlar qoldi. O‘zbekiston vaqti bilan 8-mart tongida "UFC 326" turniri doirasida ikki afsona — Maks Xollouey va Charlz Oliveyra "BMF" (eng xavfli jangchi) kamari uchun oktagonga chiqadi. Zamin.uz ushbu murosasiz bahs oldidan imkoniyatlarni tahlil qilib chiqdi.
Ushbu sportchilarning ilk to‘qnashuvida Oliveyraning bo‘ynidan olgan kutilmagan jarohati bahs taqdirini hal qilgan edi. Biroq o‘shandan beri ancha vaqt o‘tdi va ikkala jangchi ham o‘z divizionlarida yangi cho‘qqilarni zabt etishdi. Endi esa navbat haqiqiy revanshga!
Charlz Oliveyra: Parter qiroli va rekordlar sohibi
Braziliyalik jangchi UFC tarixidagi eng ko‘p bonus (21), eng ko‘p sabmishn (17) va eng ko‘p muddatidan oldin g‘alaba (21) qozongan sportchi sifatida rekordlar kitobidan joy olgan.
- Uslubi: Jiu-jitsu ustasi bo‘lgan Charlz raqibining orqasiga "xalta kabi" yopishib olish san’atini mukammal egallagan. Uning parterdagi IQ darajasi hayratlanarli.
- Zaif nuqtasi: Oliveyra klinch va yaqin masofada kuchli bo‘lsa-da, teykdaun (yerga yiqitish) borasida oqsaydi. Islom Maxachev va Arman Sarukyanga qarshi janglar buni isbotladi.
- Revanshlar ustasi: Qiziq bir fakt: Oliveyra faoliyati davomida barcha revansh janglarida (4-0) zafar quchgan.
Maks Xollouey: To‘xtatib bo‘lmas "Zambarak"
Maks — yarim yengil vazn tarixidagi eng kuchli uch jangchidan biri. Uning "Blessed" uslubi va jang so‘nggidagi 10 soniyalik ayovsiz mushtlashuvi ("qirpichoq" uslubi) MMA ixlosmandlarining sevimli sahnasiga aylangan.
- Uslubi: Noodatiy zarbalar va bitmas-tuganmas chidamlilik egasi. Uning mushtlari raqibni nafas olishga qo‘ymaydigan "bombardimon"ni eslatadi.
- Tajriba: Xollouey BMF kamarini ikki bor qo‘lga kiritgan ilk jangchi sifatida tarix yaratdi. Endi u uchinchi bor ushbu sharafni himoya qilmoqchi.
Jang taqdirini nima hal qiladi?
Bu to‘qnashuv ikki xil dunyoqarash va ikki xil uslubning kurashidir:
- Tik oyoqda: Agar jang vertikal holatda davom etsa, Xolloueyning imkoniyatlari keskin oshadi. Uning "dehqoncha" zarbalari har qanday raqibni esankiratib qo‘yadi.
- Parterda: Agar Oliveyra raqibini gilamga tortishga muvaffaq bo‘lsa, Xollouey uchun xavfli daqiqalar boshlanadi. Braziliyalikning bo‘g‘ish uslublari har qanday himoyani yorib o‘tishi mumkin.
G‘olibni nima kutmoqda?
Mazkur bahs zafar quchgan jangchi uchun katta eshiklarni ochadi. Taxminlarga ko‘ra, g‘olib kelgusida Ilya Topuriya yoki Jastin Getji bilan chempionlik kamarini birlashtirish uchun maydonga tushishi mumkin. Garchi Arman Sarukyan asosiy da’vogar bo‘lsa-da, ushbu juftlik g‘olibi reytingda va muxlislar mehri borasida ancha oldinda.
Sizningcha, 8 mart kuni oktagonda kimning qo‘li baland keladi? Xolloueyning temir mushtlarimi yoki Oliveyraning makkor sabmishnlarimi?
“Zamin”ni Telegramʻda oʻqing!
