Toshkent shahrida qizg‘in tarzda davom etayotgan FIFA Series xalqaro turniri doirasida 3-o‘rin uchun kurashda Gabon va Trinidad va Tobago terma jamoalari o‘zaro kuch sinashdi. Qiziqarli va murosasiz o‘tgan uchrashuv asosiy vaqtda 2:2 hisobida yakunlanib, muxlislarga haqiqiy futbol dramasini taqdim etdi.
Uchrashuv davomida har ikki jamoa ham faol va hujumkor o‘yin namoyish etdi. Gabon safida Gelor Kanga 33-daqiqada hisobni ochgan bo‘lsa, ikkinchi bo‘lim boshida Edlin Matuti ham gol urdi. Trinidad va Tobago esa javobsiz qolmadi — Levi Garsiya 53- va 90-daqiqalarda gol kiritib, jamoasini mag‘lubiyatdan saqlab qoldi.
Asosiy vaqtda g‘olib aniqlanmagani sababli jamoalar penaltilar seriyasida g‘olibni belgilashga majbur bo‘ldi. Bu yerda omad va mahoratini namoyon etgan afrikaliklar 3:2 hisobida ustun kelib, musobaqaning bronza medallarini qo‘lga kiritdi.
FIFA Series. 3-o‘rin uchun.
Trinidad va Tobago – Gabon 2:2 (penaltilar bo‘yicha – 2:3)
Gollar: Levi Garsiya 53, 90 – Gelor Kanga 33, Edlin Matuti 54.
Trinidad va Tobago – Brays, Peyn, Jeki, Piyerr (Makett, 88), Kardines, Jeyms, Levi Garsiya, Jastin Garsiya (Devid, 90+4), Rampersad, Mitchell, Gill (Gilbert, 46).
Gabon – Bekale, Obiang, Y.Obiang, Averlant (Kabinambele, 75), Babika, M‘Bemba, Kanga, Omfia, Samake, Matuti (Lemina, 75), Oyono, Ndong.
Endilikda barcha eʼtibor hal qiluvchi final bahsiga qaratilgan. Unda O‘zbekiston milliy jamoasi Venesuelaga qarshi maydonga tushdi. Ushbu muhim uchrashuv soat 19:00 da start oldi va muxlislar yana bir katta futbol shouni kuzatishmoqda.
Qisqasi, FIFA Series musobaqasi nafaqat qiziqarli natijalar, balki kutilmagan burilishlar bilan ham muxlislarni hayratda qoldirmoqda. Endi esa barcha intizorlik finalga qaratilgan — haqiqiy shou hali oldinda!
“Zamin”ni Telegramʻda oʻqing!
