Angliya futbolida katta eʼtibor markazida bo‘lib turgan masalalardan biri — Pep Gvardiolaning kelajagi. Manbalar, jumladan The Telegraph tarqatgan maʼlumotlarga ko‘ra, “Manchester Siti” bosh murabbiyi o‘z taqdiriga oid yakuniy qarorni faqat joriy mavsum tugagach qabul qiladi.
Ayni paytda ispaniyalik mutaxassis klubda yana bir yil qolish-qolmasligi borasida aniq qarorga kelmagan. Uning amaldagi shartnomasi 2027 yil yozigacha mo‘ljallangan bo‘lsa-da, Gvardiola o‘z rejalarini bosqichma-bosqich va vaziyatdan kelib chiqib belgilashni maʼqul ko‘rmoqda.
Qizig‘i shundaki, “shaharliklar” rahbariyati murabbiyning bunday yondashuvini to‘liq qo‘llab-quvvatlamoqda. Klub tomonidan unga hech qanday bosim o‘tkazilmayapti va tomonlar o‘rtasidagi munosabatlar o‘zaro ishonch va hurmatga asoslangani taʼkidlanmoqda.
Shu bilan birga, “Manchester Siti” ehtimoliy ssenariylarga ham tayyorgarlik ko‘rmoqda. Klub rahbariyati Gvardiola jamoani tark etgan taqdirda uning o‘rnini egallashi mumkin bo‘lgan mutaxassislardan iborat qisqa ro‘yxat shakllantirgan. Ushbu ro‘yxatga “Chelsi”ning sobiq bosh murabbiyi Enso Mareska, “Real”da ishlagan va hozirda yuqori baholanayotgan mutaxassis Xabi Alonso, shuningdek “Bavariya”ni boshqarayotgan Vensan Kompani kabi nomlar kiritilgan. Bu jarayonni klubning sport direktori Ugo Viana nazorat qilmoqda.
Shu o‘rinda aytish joiz, ayrim manbalarda “Siti” rahbariyati Gvardioladan kelasi mavsumda qolish-qolmasligi haqida aniq javob talab qilgani haqidagi xabarlar tarqalgan edi. Ammo bu maʼlumotlar haqiqatga to‘g‘ri kelmasligi taʼkidlanmoqda.
Hozirgi turnir vaziyatiga nazar tashlasak, “Manchester Siti” Angliya Premyer-ligasida 30 turdan so‘ng 61 ochko bilan ikkinchi o‘rinda bormoqda. Jamoa peshqadam “Arsenal”dan bir o‘yin kam o‘tkazgan holda 9 ochko orqada qolmoqda.
Eslatib o‘tamiz, Pep Gvardiola “Siti”ni 2016 yildan beri boshqarib kelmoqda va bu vaqt ichida jamoani Yevropa va Angliyaning eng kuchli klublaridan biriga aylantirishga muvaffaq bo‘ldi. Endi esa muxlislarning asosiy savoli — u yana qancha vaqt “Etihad”da qoladi?
“Zamin”ni Telegramʻda oʻqing!
