Super og‘ir vazn toifasida WBA, WBC, IBF va IBO kamarlarini qo‘lga kiritgan, hali mag‘lubiyat nimaligini tatib ko‘rmagan ukrainalik Aleksandr Usik ehtimoliy katta jang haqida o‘z fikrlarini bildirdi.
Maʼlumki, boks muxlislari intiqlik bilan kutayotgan to‘qnashuv — britaniyalik yulduzlar Tayson Fyuri va Entoni Joshua o‘rtasida bo‘lishi mumkin. Aynan shu jang haqida so‘ralganda Usik aniq va ishonchli javob qaytardi.
«Ey Jey g‘alaba qozonadi. U kelajakda mutlaq jahon chempioni bo‘ladi», — dedi 39 yoshli chempion Verxuvenga qarshi bo‘lajak bahs oldidan tashkil etilgan matbuot anjumanida.
Entoni Joshua bugungi kunda 36 yoshda bo‘lib, professional ringda 2013 yildan beri ishtirok etib kelmoqda. Uning hisobida 29 ta g‘alaba mavjud bo‘lib, ularning 26 tasi muddatidan avval yakunlangan. Shu bilan birga, u faoliyati davomida 4 marta mag‘lubiyatga uchragan.
Joshua nafaqat professional boksda, balki havaskorlar orasida ham ulkan yutuqlarga erishgan. U 2012 yilgi Olimpiya o‘yinlari chempioni sifatida tanilgan va sportdagi xizmatlari uchun Britaniya imperiyasi ordeni bilan taqdirlangan.
Qizig‘i shundaki, ushbu ehtimoliy jang tashabbusi aynan Tayson Fyuridan chiqqan. U hamyurtini ochiqcha ringga chorlagan va Joshua ham bu chaqiriqni qabul qilgani maʼlum qilingan.
Endi esa barchada savol bitta: Usik aytganidek, Joshua haqiqatan ham Fyuridan ustun kela oladimi? Bu savolga javobni faqat ringning o‘zi beradi.
“Zamin”ni Telegramʻda oʻqing!
