“Liverpul” bosh murabbiyi Arne Slot joriy mavsumdan so‘ng jamoa tarkibida jiddiy o‘zgarishlar amalga oshirilishini maʼlum qildi. Uning so‘zlariga ko‘ra, klub yangi chempionatga mutlaqo yangilangan tarkib bilan kirib boradi.
Mavsum yakuniga kelib, jamoaning uzoq yillar yetakchilari bo‘lgan Moxamed Salax va Endi Robertson bilan xayrlashish ehtimoli juda yuqori ekani aytilmoqda. Bu qaror klubning yangi strategiyasi bilan bog‘liq.
Slot yana bir qator futbolchilar bilan ham yo‘llar ajralishi mumkinligini taʼkidladi. Uning fikricha, “Liverpul” har mavsumda moliyaviy va sport modeliga mos ravishda tarkibni qayta shakllantirishga majbur bo‘ladi.
Murabbiy o‘tgan mavsumni ham misol qilib keltirdi: o‘shanda Kuivin Kellexer, Jarell Kuansa, Tayler Morton, Ben Doak, Luis Dias va Darvin Nunyes kabi futbolchilar bilan xayrlashilgan edi.
Slotning taʼkidlashicha, klub transfer siyosati shunday qurilganki, yangi o‘yinchilarni olish uchun baʼzi futbolchilarni sotishga to‘g‘ri keladi. Bu model murakkab bo‘lsa-da, oldin ham o‘z samarasini bergan.
U yangi kelgan futbolchilarni yuqori baholab, ular Premyer-ligada ikkinchi mavsumga yana-da kuchli tayyorgarlik bilan kirishiga umid bildirdi. Murabbiyning fikricha, jamoa kelajagi ijobiy ko‘rinadi, ayniqsa agar yozgi transferlar muvaffaqiyatli o‘tsa.
Qisqasi, “Liverpul”da yangi davr boshlanmoqda — bir tarafdan xayrlashuvlar, ikkinchi tarafdan esa yangilanish.
“Zamin”ni Telegramʻda oʻqing!
