Gvardiola: "Manchester Siti" gʻalabasi omad emas, mehnat natijasi
"Manchester Siti" bosh murabbiyi Xosep Gvardiola "Byornli" ustidan qozonilgan g'alabani omad emas, balki jamoaning tinimsiz mehnati va ko'plab hujumlari natijasi deb baholadi. Ushbu muvaffaqiyatdan so'ng "shaharliklar" 70 ochko jamg'argan holda turnir jadvalida peshqadamlikni qo'lga kiritishdi. Murabbiy chempionlik uchun kurash qizg'in pallaga kirganini va endi har bir uchrashuv jamoa uchun finalga teng ekanligini ta'kidladi.
"Manchester Siti" bosh murabbiyi Xosep Gvardiola "Byornli"ga qarshi oʻyindan keyin jamoasining gʻalabasiga “omad kulib boqdi” degan fikrlarga javob qaytardi. Angliya Premer-ligasining 34-tur uchrashuvida “Siti” minimal hisob — 1:0 bilan zafar quchdi.
Gvardiolaning soʻzlariga koʻra, gʻalaba tasodif emas, balki qilingan mehnatning natijasi. U jamoa oʻyin davomida 28 ta zarba berganini taʼkidlab, har bir urinish ortida katta mehnat yotganini aytdi.
“Hayotda omad albatta bor, lekin u shunchaki tushib kelmaydi. Unga loyiq boʻlish kerak. Biz koʻp urinamiz, koʻp hujum qilamiz, shundagina natija chiqadi,” — dedi u.
Ushbu gʻalabadan keyin jadvalda katta oʻzgarish yuz berdi. "Manchester Siti" 70 ochko bilan birinchi oʻringa chiqdi. Xuddi shuncha ochko jamgʻargan "Arsenal" esa ikkinchi oʻringa tushdi.
Hozir chempionlik uchun kurash juda qizgʻin. Har bir oʻyin endi final kabi ahamiyatga ega va Gvardiola jamoasi har bir imkoniyatni maksimal darajada ishlatishga harakat qilmoqda.
Izohlar 0
…