Serbiya futbolida yangi yulduz porlamoqda. «Srvena zvezda» akademiyasi tarbiyalanuvchisi, 17 yoshli hujumkor yarim himoyachi Vasilije Kostov o'zining sermahsul o'yini bilan Yevropaning eng kuchli klublari nazariga tushdi. Joriy mavsumda u kattalar darajasidagi debyutini o'tkazib, gol va assistlar sonini 21 taga yetkazdi. Uning iqtidori «Arsenal», «Barselona» va «Bavariya» kabi jamoalarni qiziqtirib qo'ydi. Bu haqda Goal.com xabar beradi.
Kostov 2008 yil may oyida Belgradda tug'ilgan va yetti yoshidan buyon «Srvena zvezda» tizimida to'p suradi. U 15 yoshidayoq 17 yoshgacha bo'lgan jamoada 20 ta golda ishtirok etib, mutaxassislar e'tiborini qozongan edi. Ayniqsa, «Partizan»ga qarshi kechgan «Abadiy derbi» bahslarida kiritgan gollari uni muxlislarning sevimlisiga aylantirdi. 2025 yil aprel oyida u Serbiya Superligasida debyut qildi.
Hozirda jamoani boshqarayotgan afsonaviy Dejan Stankovic qo'l ostida Kostov yanada o'sishga erishdi. U maydonda asosan «o'ninchi raqam» vazifasini bajaradi va o'yin uslubi bilan ko'proq Iskoni eslatib yuboradi. Futbolchi fevral va mart oylari oralig'ida oltita o'yinda oltita gol urib, o'zining dinamik harakatlari bilan jamoasining asosiy yetakchisiga aylandi.
Sobiq bosh murabbiy Vladan Milojevic yosh iqtidorning ishga bo'lgan munosabatini yuqori baholadi. Uning ta'kidlashicha, Kostov murabbiylar ko'rsatmasiga amal qilishi va o'z ustida tinimsiz ishlashi bilan ajralib turadi. Garchi futbolchi himoyaviy harakatlarda biroz oqsasa-da, uning texnikasi va maydonni ko'rish qobiliyati kelajakda jahon darajasidagi yulduz bo'lishidan dalolat bermoqda.
“Zamin”ni Telegramʻda oʻqing! 
