"Tottenxem" va "Nottingem Forest" klublarining sobiq bosh murabbiyi Anje Postekoglu UEFAda nufuzli lavozimni egalladi. 60 yoshli mutaxassis tashkilotning texnik kuzatuvchisi etib tayinlandi va o'zining ilk vazifasini bajarish uchun "Enfild" stadioniga tashrif buyurdi. U Yevropa futboli boshqaruv organi uchun zamonaviy o'yinlardagi taktik tendensiyalarni aniqlashga ko'maklashadi. Bu haqda Goal.com xabar beradi.
Avstraliyalik mutaxassis 2026 yil yanvar oyidan rasman o'z vazifasiga kirishdi. U Garet Sautgeyt, Roberto Martines va Ole Gunnar Sulsher kabi taniqli murabbiylardan iborat tahliliy guruhga qo'shildi. Postekoglu endilikda Yevropa Chempionlar ligasi va boshqa nufuzli musobaqalarning markazida bo'lib, o'yinlarni bevosita stadionlardan kuzatib boradi.
Postekogluning birinchi yirik topshirig'i YCHL chorak finali doirasidagi "Liverpul" va "PSJ" o'rtasidagi uchrashuvni tahlil qilish bo'ldi. Bahs mersisaydliklarning 0:2 hisobidagi mag'lubiyati bilan yakunlangan bo'lsa-da, mutaxassis o'z hisobotida jamoaning himoyadagi ijobiy jihatlarini qayd etdi. U «Liverpul» futbolchilarining zonal himoya doirasida raqibga nisbatan qanday bosim o'tkazganini alohida ta'kidladi.
Mutaxassisning tahliliy hisoboti 2025-26 yilgi mavsum yakunlari bo'yicha UEFAning rasmiy texnik sharhiga kiritiladi. Bu ma'lumotlar butun qit'adagi murabbiylar uchun yuqori darajadagi pley-off o'yinlarida jamoalar qanday moslashayotganini tushunishda muhim manba bo'lib xizmat qiladi. Postekoglu mavsum yakuniga qadar yana bir qator muhim uchrashuvlarda ishtirok etishi kutilmoqda.
“Zamin”ni Telegramʻda oʻqing! 
