«Man Siti» bosh murabbiyi Pep Gvardiola «Liverpul» yulduzi Muhammad Salaxning futboldagi merosini yuqori baholadi. Murabbiy misrlik hujumchini nafaqat mersisaydliklar, balki butun Angliya Premyer-ligasining haqiqiy afsonasi deb hisoblaydi. Bu haqda Goal.com xabar beradi.
Salax to'qqiz yillik faoliyatidan so'ng joriy mavsum yakunida «Enfild»ni tark etishi kutilmoqda. Gvardiola Angliya kubogi chorak finali doirasidagi o'yin oldidan o'tkazilgan matbuot anjumanida futbolchining barqaror o'yini va statistik ko'rsatkichlariga alohida to'xtalib o'tdi.
«Salax — buyuk o'yinchilardan biri. U nafaqat ajoyib futbolchi, balki juda yaxshi inson hamdir.
Uning gollari va assistlari, erishgan barcha yutuqlari uni afsonaga aylantirdi», — dedi Gvardiola. Shuningdek, murabbiy Salax futbol olami va Angliya uchun qilgan xizmatlari evaziga munosib tarzda kuzatib qo'yilishga loyiqligini ta'kidladi.
Suhbat davomida Pep Gvardiola o'z shogirdi Fil Foden haqida ham fikr bildirdi. Murabbiy 25 yoshli futbolchining hozirgi holatidan xavotirda emasligini va u tez orada o'zining eng yaxshi formasiga qaytishiga ishonishini aytdi.
Foden joriy mavsumda 41 ta o'yinda 10 ta gol urishga muvaffaq bo'ldi. Gvardiolaning so'zlariga ko'ra, har bir futbolchining faoliyatida pasayishlar bo'lishi tabiiy holat.
Foden allaqachon olti marta Premyer-liga g'olibi bo'lgan va uning jamoaga qo'shgan hissasi beqiyosdir.
“Zamin”ni Telegramʻda oʻqing!
