Yevropa futbolidagi eng shiddatli qarama-qarshiliklardan biri yana bir bor tarixga kirdi. UYEFA Chempionlar ligasi yarimfinalining ilk uchrashuvida "Bavariya" raqib maydonida PSJga 4:5 hisobida magʻlub boʻldi.
Ushbu bahsda eʼtibor markazidagi figuralardan biri — myunxenliklar darvozaboni Manuel Noyer boʻldi. Taҗribali golkiper ushbu oʻyinda oʻz darvozasi tomon aniq yoʻnaltirilgan barcha zarbalarni oʻtkazib yubordi. Parijliklar tomonidan amalga oshirilgan 5 ta aniq zarbaning birortasi ham qaytarilmadi — Noyer bu safar birorta seyv amalga oshira olmadi.
Opta Sports maʼlumotiga koʻra, Chempionlar ligasi pley-off bosqichida bunday noxush statistika soʻnggi bor 2000 yilda qayd etilgan. Oʻshanda "Chelsi" darvozaboni Ed de Guy ham "Barselona"ga qarshi uchrashuvda 5 ta aniq zarbaning barchasini oʻtkazib yuborgan va birorta ham seyv qilolmagan edi.
Albatta, bu holat Noyer darajasidagi darvozabon uchun kam uchraydigan vaziyat hisoblanadi. Biroq futbolda baʼzan eng tajribali futbolchilar ham qiyin kechalarni boshdan kechirishi mumkin.
Eslatib oʻtamiz, javob uchrashuvi 6 may kuni Myunxenda boʻlib oʻtadi. Ushbu hal qiluvchi bahsda “Bavariya” hisobni oʻzgartirish va finalga chiqish uchun barcha imkoniyatlarini ishga solishi kutilmoqda.
Gʻolib esa finalda "Arsenal" — "Atletiko" juftligi gʻolibi bilan kuch sinashadi.
Qisqasi, Noyer uchun bu oʻyin ogʻir kechdi, ammo oldinda hali barchasini tuzatish imkoniyati bor. Endi asosiy savol — Myunxendagi javob bahsida qanday ssenariyni koʻramiz?
“Zamin”ni Telegramʻda oʻqing!
