Bruno Fernandes so'nggi uch yil ichida "Manchester Yunayted"ni tark etish bo'yicha bir nechta takliflarni rad etganini ma'lum qildi. Portugaliyalik futbolchi Saudiya Arabistoni va boshqa chempionatlardan qiziqish bo'lishiga qaramay, jamoada qolishni afzal ko'rdi. Bu haqda Goal.com xabar beradi.
Uning asosiy maqsadi klubni avvalgi shon-shuhratiga qaytarish hisoblanadi.
Jamoa sardori Sky Sports telekanaliga bergan intervyusida o'z qarorini tushuntirib o'tdi. Uning ta'kidlashicha, "Manchester Yunayted"da muvaffaqiyatga erishish boshqa har qanday klubdagi yutuqlardan ko'ra muhimroqdir.
Fernandes muxlislarning ishtiyoqini yaxshi tushunishini va ular bilan bir kemada ekanligini aytdi.
"Men ikki yoki uch yil oldin ketishim mumkin edi, ammo bu yerda qolishni juda xohlayman. Angliya Premyer-ligasi va Chempionlar ligasida g'olib chiqish niyatim borligini hech qachon yashirmaganman", — dedi yarim himoyachi.
U shartnomasi yakunlanguniga qadar ushbu maqsadlar sari harakat qilishini qo'shimcha qildi.
Oldinda "Manchester Yunayted"ni "Liverpul"ga qarshi muhim uchrashuv kutib turibdi. Ushbu o'yindagi g'alaba jamoaning kelasi mavsum uchun Chempionlar ligasiga yo'llanma olish imkoniyatlarini saqlab qolishda katta ahamiyatga ega.
“Zamin”ni Telegramʻda oʻqing!
