Manchester Siti so‘nggi 10 yildagi ilk chempionlik unvoni sari dadil odimlamoqda, biroq jamoa muxlislarini xavotirga solayotgan bir masala bor. Klubning asosiy hujumchisi Xadija Shouning shartnomasi yozda yakuniga yetadi va tomonlar hali yangi kelishuvga erishgani yo‘q. 21 ta o‘yinda 19 ta gol urgan va ketma-ket uchinchi bor "Oltin butsa"ga da’vogar bo‘lib turgan futbolchining ketishi jamoa loyihasi uchun katta yo‘qotish bo‘lishi mumkin. Bu haqda Goal.com xabar beradi.
Matbuot xabarlariga ko‘ra, Xadija Shou yozda Manchester Sitini tark etishi deyarli aniq. Chelsi klubi futbolchiga yiliga 1 million funt sterlinglik shartnoma taklif qilib, uni o‘z safiga qo‘shib olish uchun asosiy da’vogarga aylandi. Bu transfer raqib jamoani kuchaytirib, Manchester Siti uchun jiddiy zarba bo‘lishi kutilmoqda.
Klub so‘nggi yillarda Khiara Keating, Yui Hasegawa va Lauren Hemp kabi yetakchi futbolchilar bilan shartnomalarni uzaytirishda faol bo‘lgan. Shunday vaziyatda, jamoaning eng samarali hujumchisi bilan muzokaralar cho‘zilib ketgani tushunarsiz. Xadija Shouning o‘zi ham Manchesterda qolishga moyillik bildirganiga qaramay, vaziyat keskin tus olgan.
Murabbiy Andree Jeglertz qo‘l ostida Xadija Shou va Miedema tandemi ajoyib o‘yin ko‘rsatmoqda. Biroq, agar klub o‘zining jahon darajasidagi hujumchisini saqlab qola olmasa, bu jamoaning kelgusi mavsumdagi ambitsiyalariga salbiy ta’sir ko‘rsatishi shubhasiz.
“Zamin”ni Telegramʻda oʻqing!
