AQSHning Las-Vegas shahrida o‘tkazilgan UFC 328 turniri o‘z yakuniga yetdi. Jang oqshomi muxlislarga keskin to‘qnashuvlar, sabmishnlar, nokautlar va kutilmagan natijalarni taqdim etdi. Ayniqsa, kechaning markaziy jangi — Xamzat Chimayev va Shon Striklend o‘rtasidagi qarama-qarshilik katta qiziqish bilan kuzatildi.
Asosiy jangda amerikalik Shon Striklend taniqli MMA ustasi Xamzat Chimayevga qarshi oktagonga ko‘tarildi. Murosasiz kechgan bahsda Striklend ochkolar hisobida g‘alaba qozonib, chempionlik kamarini qo‘lga kiritdi. Bu natija UFC muxlislari orasida katta muhokamalarga sabab bo‘lishi aniq. Chunki Chimayev jang oldidan favoritlardan biri sifatida ko‘rilgan, ammo Striklend o‘zining tajribasi, sabri va taktik rejasi bilan muhim g‘alabani ilib ketdi.
Kechaning yana bir e’tiborli jangida Joshua Van Tatsuro Tayrani 5-raundda texnik nokautga uchratib, chempionlik kamarini o‘zida saqlab qoldi. Ushbu to‘qnashuv ham tomoshabinlarga haqiqiy chempionlik xarakteri qanday bo‘lishini ko‘rsatdi.
Og‘ir vazn toifasida Aleksandr Volkov Valdo Kortes-Akostaga qarshi oktagonga chiqdi. Jang to‘liq davom etdi va yakunda hakamlar yakdil qarori bilan Volkov g‘alaba qozondi. Hakamlar 30-27, 29-28, 29-28 hisoblarini qayd etishdi.
Shon Bredi ham Xoakin Bakliga qarshi jangda ishonchli harakat qildi. U hakamlarning yakdil qaroriga ko‘ra g‘alaba qozondi. Hisoblar 30-25, 30-25 va 30-27 ko‘rinishida bo‘ldi. Bu natija Brediyng tayyorgarligi va oktagondagi ustunligini yaqqol ko‘rsatdi.
Kecha davomida tezkor yakunlangan janglar ham ko‘p bo‘ldi. Jim Miller birinchi raundda Jared Gordonni bo‘g‘ish usuli bilan mag‘lub etdi. Bobbi Grin esa birinchi raundda Stivensni sabmishn orqali taslim qildi. MMAda “vaqt bor” degan gap yo‘q — bir xato, bir ushlash, tamom.
Yaroslav Amosov ikkinchi raundda Yoel Alvaresni bo‘g‘ish usuli bilan mag‘lubiyatga uchratdi. Ateba Gote esa ikkinchi raundda Ozzi Diazni nokautga uchratib, muxlislarga yorqin jang taqdim etdi.
UFC 328 natijalari:
- Xose Ochoa hakamlarning yakdil qarori bilan Kleyton Karpenterni mag‘lub etdi — 30-27, 30-27, 30-27.
-Baysangur Susurkayev 3-raundda Jordan Santosni sabmishn orqali yengdi.
-Pet Sabatini ochkolar hisobida Uilyam Gomisdan ustun keldi.
-Roman Kopilov Marko Tulioni hakamlarning yakdil qarori bilan mag‘lub etdi — 29-28, 29-28, 29-28.
-Jim Miller 1-raundda Jared Gordonni bo‘g‘ish usuli bilan taslim qildi.
-Grant Douson 3-raundda Mateush Rebetskini sabmishn orqali mag‘lub etdi.
-Yaroslav Amosov 2-raundda Yoel Alvaresni bo‘g‘ish usuli bilan yengdi.
-Ateba Gote 2-raundda Ozzi Diazni nokautga uchratdi.
-Bobbi Grin 1-raundda Stivensni sabmishn orqali taslim qildi.
-Shon Bredi hakamlarning yakdil qarori bilan Xoakin Baklini mag‘lub etdi — 30-25, 30-25, 30-27.
-Aleksandr Volkov hakamlarning yakdil qarori bilan Valdo Kortes-Akostadan ustun keldi — 30-27, 29-28, 29-28.
-Joshua Van 5-raundda Tatsuro Tayrani texnik nokautga uchratib, chempionlik kamarini himoya qildi.
-Shon Striklend ochkolar hisobida Xamzat Chimayevni mag‘lub etib, chempionlik kamarini qo‘lga kiritdi.
Umuman olganda, UFC 328 turniri muxlislar uchun juda qiziqarli va voqealarga boy kechdi. Striklendning Chimayev ustidan qozongan g‘alabasi kechaning eng katta voqeasi bo‘ldi. Endi MMA olamida asosiy savol bitta: Chimayev bu mag‘lubiyatdan qanday xulosa chiqaradi va Striklend chempionlik kamarini qancha vaqt ushlab tura oladi?
“Zamin”ni Telegramʻda oʻqing!
