Ispaniya terma jamoasi Jahon chempionati oldidan jiddiy muammolarga duch kelmoqda. "Atletik Bilbao" vingeri Niko Uilyams La Liga doirasidagi "Valensiya"ga qarshi o‘yinda mushaklaridagi jarohat sababli maydonni muddatidan avval tark etishga majbur bo‘ldi. Bu haqda Goal.com xabar beradi.
Uchrashuvning 36-daqiqasida o‘zini noqulay his qilgan futbolchi oqsoqlanib maydonni tark etdi. Uilyams maydon chetiga chiqib ketayotganda "bunday bo‘lishi mumkin emas" deya qayta-qayta takrorlagani jarohatning jiddiyligidan dalolat beradi. Uning o‘rniga maydonga akasi Inaki Uilyams tushirildi.
Bu holat Ispaniya bosh murabbiyi Luis de la Fuente uchun katta boshog‘riqqa aylandi. Avvalroq "Barselona" yulduzi Lamine Yamal ham mavsum yakuniga yetmay jarohat olgan edi. Ispaniya terma jamoasining hujum chizig‘idagi asosiy tayanchi bo‘lgan bu ikki yosh vingerning safdan chiqishi jamoa taktikasini tubdan o‘zgartirishni talab qilishi mumkin.
Niko Uilyams joriy mavsumda "Atletik" safida 32 ta o‘yinda maydonga tushib, 6 ta gol va 7 ta golli uzatmaga mualliflik qilgan. Biroq, uzoq vaqtdan beri qiynab kelayotgan son qismidagi og‘riqlar futbolchining barqaror o‘yin ko‘rsatishiga to‘sqinlik qilmoqda.
"Atletik" tibbiy shtabi dushanba kuni futbolchining holati bo‘yicha rasmiy ma’lumot berishi kutilmoqda. Ispaniya terma jamoasi 9-iyun kuni Peruga qarshi o‘rtoqlik o‘yini, 15-iyun kuni esa Jahon chempionati guruh bosqichida Kabo-Verdega qarshi bahs bilan o‘z yurishini boshlaydi.
“Zamin”ni Telegramʻda oʻqing!
