Philadelphia Union jamoasining yosh iqtidor egasi Cavan Sullivan MLS chempionatida o‘zining ilk golini kiritib, tarixiy natijani qayd etdi. Kelajakda Manchester Siti safida to‘p surishi kutilayotgan 16 yoshli hujumkor yarim himoyachi Orlando City SC jamoasiga qarshi kechgan bahsda o‘zining yuqori salohiyatini namoyish qildi. Bu haqda Goal.com xabar beradi.
Garchi uchrashuv Philadelphia Union uchun 4:3 hisobidagi mag‘lubiyat bilan yakunlangan bo‘lsa-da, Sullivan o‘yinning asosiy qahramonlaridan biriga aylandi. U nafaqat gol urdi, balki jamoasining birinchi goliga ham mualliflik qilgan hujumda muhim rol o‘ynadi. Ben Benderning uzatmasidan so‘ng, yosh futbolchi 75-daqiqada darvozani aniq nishonga oldi.
Sullivan 14 yoshida professional shartnoma imzolab, allaqachon CONCACAF Chempionlar ligasida ham o‘zini ko‘rsatib ulgurgan. Joriy mavsumda u o‘yin amaliyotini sezilarli darajada oshirib, 377 daqiqa maydonda harakat qildi va ikki bor golli uzatmani amalga oshirdi.
Hozirgi vaqtda Philadelphia Union jamoasi chempionatda qiyin davrni boshdan kechirmoqda va turnir jadvalining quyi qismida bormoqda. Shunga qaramay, Sullivan kabi yosh yulduzlarning o‘yini muxlislar va mutaxassislarda katta umid uyg‘otmoqda.
“Zamin”ni Telegramʻda oʻqing!
