"Arsenal" bugun "Byornli"ga qarshi chempionlik uchun maydonga tushadi

Bugun, 18 may kuni Angliya Premyer-ligasining 37-turida “Arsenal” o‘z maydonida “Byornli”ni qabul qiladi. Londonliklar uchun bu bellashuv oddiy uchrashuv emas — chempionlik sari yana bir muhim qadam bo‘lishi mumkin.

Ayni paytda Mikel Arteta shogirdlari 79 ochko bilan APL turnir jadvalida peshqadamlik qilmoqda. Ularning asosiy raqibi “Manchester Siti” 77 ochko bilan ikkinchi o‘rinda bormoqda. Demak, mavsum yakuniga ikki tur qolgan bir paytda har bir ochko oltin qiymatiga ega.

“Arsenal”ning bugungi raqibi “Byornli” esa allaqachon Chempionshipga tushib ketgan. Shu sabab mehmonlar Londonga turnir bosimisiz tashrif buyuradi. Bir tomondan, bu “Arsenal” uchun qulay holatdek ko‘rinadi. Ikkinchi tomondan, bosimsiz o‘ynaydigan raqib ba’zan eng xavfli raqibga aylanadi.

Jamoalarning so‘nggi o‘zaro uchrashuvlariga nazar tashlasak, ustunlik “Arsenal” tomonida. APL doirasidagi oxirgi 5 o‘yinning 4 tasida “to‘pchilar” g‘alaba qozongan, yana bir bahs durang bilan yakunlangan.

So‘nggi o‘zaro o‘yinlar:

• 01.11.2025. “Byornli” — “Arsenal” 0:2

• 17.02.2024. “Byornli” — “Arsenal” 0:5

• 11.11.2023. “Arsenal” — “Byornli” 3:1

• 23.01.2022. “Arsenal” — “Byornli” 0:0

• 18.09.2021. “Byornli” — “Arsenal” 0:1

Agar bugun “Arsenal” ochko yo‘qotmasa, so‘nggi tur oldidan chempionlik uchun juda yaxshi imkoniyatga ega bo‘ladi. Qolaversa, “Manchester Siti” safarda “Bornmut”ni mag‘lub eta olmasa, londonliklar chempionlikni muddatidan oldin rasmiylashtirishi ham mumkin.

Bu ssenariy umuman fantastika emas. Chunki “Bornmut” ham Chempionlar ligasi yo‘llanmasi uchun kurashmoqda va APLda 16 ta o‘yindan beri mag‘lubiyatga uchramayapti. “Olchalar” o‘z maydonida “Siti”ga jiddiy qarshilik ko‘rsatishi kutilmoqda.

Taxminiy tarkiblar:

“Arsenal”: Rayya, Moskera, Saliba, Gabriel, Kalafiori, Rays, Lyuis-Skelli, Saka, Trossar, Edegor, Gokeresh.

“Byornli”: Vays, Uoker, Tuanzebe, Estev, Pires, Mejbri, Florentinu, Ugochukvu, Chauna, Flemming, Entoni.

“Arsenal” safida jiddiy yo‘qotishlar yo‘q. Arteta asosiy futbolchilaridan foydalanishi va jamoani maksimal natija uchun maydonga tushirishi mumkin. “Byornli”da esa vaziyat boshqacha: jamoa Chempionshipga tushib ketgani uchun kam o‘yin amaliyotiga ega futbolchilarga imkoniyat berilishi ehtimoli bor.

Hozirda “Byornli”ni Mayk Jekson vaqtinchalik boshqarmoqda. Shu sabab u qanday tarkib va qanday reja bilan maydonga tushishini oldindan aytish qiyin. Ammo bir narsa aniq: “Arsenal” bugun raqibni kamsitmasligi kerak.

Eslatib o‘tamiz, “Arsenal” — “Byornli” uchrashuvi bugun, 18 may kuni Toshkent vaqti bilan soat 23:59 da start oladi.

Qisqasi, “Arsenal” uchun bugungi o‘yin chempionlik eshigini yanada kengroq ochishi mumkin. “Byornli” bosimsiz, “Arsenal” esa katta orzu bilan maydonga tushadi. Endi hammasi 90 daqiqaga bog‘liq: Londonda chempionlik hidi kelyapti, lekin futbolda oxirgi hushtakkacha hech narsa kafolat emas.