Tomas Tuxel uchun qaror qabul qilish vaqti keldi. Germaniyalik mutaxassis 2026-yilgi Jahon chempionati uchun Angliya terma jamoasining yakuniy tarkibini eʻlon qilish arafasida turibdi. 2025-yilning mart oyida ish boshlagan Tuxelning oldiga aniq vazifa qoʻyilgan edi: "Uch sherlar"ni 60 yillik tanaffusdan soʻng chempionlik shohsupasiga olib chiqish. Endi u Shimoliy Amerikadagi turnirda gʻoliblik uchun kurasha oladigan 26 nafar futbolchini tanlab olishi lozim. Bu haqda Goal.com xabar beradi.
Juma kuni Tuxel 55 kishilik kengaytirilgan roʻyxatni yarmidan koʻproqqa qisqartiradi. 15 oylik kuzatuvlardan soʻng murabbiy oʻz qarorini deyarli shakllantirib boʻlgan, biroq ayrim pozitsiyalar boʻyicha hali ham jiddiy savollar mavjud. Tarkibdan tushib qoladigan futbolchilarga qoʻngʻiroq qilib, noxush xabarni yetkazish jarayoni har qanday murabbiy uchun ogʻriqli kechishi tabiiy. Har bir tanlov muxlislar va OAV oʻrtasida qizgʻin bahslarga sabab boʻlishi kutilmoqda.
Eng katta eʻtibor "oʻninchi raqam" pozitsiyasiga qaratilgan. Jud Bellingem, Morgan Rogers va Eberechi Eze tarkibga kirishi deyarli aniq boʻlsa-da, Cole Palmer va Fil Foden masalasi soʻroq ostida qolmoqda. Chelsi va Manchester Siti yulduzlari joriy mavsumda oʻzlariga oʻxshamayapti. Palmer jismoniy holat bilan bogʻliq muammolarga duch kelgan boʻlsa, Fil Foden oʻz sport formasini yoʻqotib qoʻygan. Mart oyidagi yigʻinda ham har ikki futbolchi oʻzini koʻrsata olmadi.
Agar tanlov faqat shu ikki yulduz oʻrtasida boʻlsa, Palmer Tottenxemga qarshi oʻyindagi harakatlari bilan biroz ustunroq koʻrinishi mumkin. Biroq, kutilmagan qaror qabul qilinishi ham ehtimoldan xoli emas. Ularning oʻrnini 2026-yilda Angliya Premer-ligasida 11 ta gol urishga ulgurgan Morgan Gibbs-White egallashi mumkin. Tuxelning yakuniy tanlovi Angliyaning jahon tojini qaytarish yoʻlidagi asosiy poydevori boʻladi.
“Zamin”ni Telegramʻda oʻqing!
