Arsenal himoyachisi Uilyam Saliba Angliya Premer-ligasida gʻolib chiqqandan soʻng jamoaning ishtahasi yanada ochilganini va endi bor eʼtibor Chempionlar ligasi doirasidagi PSJga qarshi bahsga qaratilganini maʼlum qildi. Fransiyalik futbolchi Mikel Arteta qoʻl ostida qoʻlga kiritilgan chempionlik bu shunchaki boshlanishi ekanini taʼkidladi. Bu haqda Goal.com xabar beradi.
Saliba Parij klubining hujumkor salohiyatini yuqori baholadi. Luis Enrique jamoasi tarkibidagi Ousmane Dembele va Khvicha Kvaratskhelia kabi yulduzlar har qanday raqib uchun xavf tugʻdirishini tan oldi. "Ular oʻtgan yili ham qoʻrqinchli edi, bu yil ham shundayligicha qolmoqda. Agar ularni magʻlub etmoqchi boʻlsak, 100 foiz kuchimizni ishga solishimiz kerak", — dedi himoyachi.
Shunga qaramay, Saliba Arsenal himoya chizigʻiga toʻliq ishonadi. Uning soʻzlariga koʻra, joriy mavsumdagi eng yaxshi himoyaga ega jamoa sifatida London klubi bunday darajadagi hujumchilarga qarshi oʻynashdan zavq oladi. Himoyachi Budapeshtda boʻlib oʻtadigan uchrashuvda gʻalaba qozonish uchun barcha imkoniyatlar mavjudligini bildirdi.
Premer-ligadagi zafar Arsenal uchun ketma-ket uch yillik omadsizlikdan soʻng kelgan uzoq kutilgan natija boʻldi. Saliba avvalgi mavsumlarda ikkinchi oʻrin bilan cheklanish ruhiy jihatdan ogʻir boʻlganini, biroq bu tajriba jamoani yanada kuchliroq qilganini qoʻshimcha qildi. Endilikda "toʻpchilar" nafaqat ichki chempionatda, balki Yevropa maydonlarida ham gegemonlik qilishni maqsad qilgan.
“Zamin”ni Telegramʻda oʻqing!
