Martin Odegaard yakshanba kuni tushdan keyin Angliya Premer-ligasi kubogini boshi uzra baland koʻtardi. "Kanonirlar" 22 yillik tanaffusdan soʻng ilk bor chempionlikni nishonlashdi. Mikel Arteta shogirdlari mavsumning soʻnggi turida "Kristal Pelas" mehmoni boʻlib, 2:1 hisobida gʻalaba qozonishdi. Shu tariqa, London klubi turnir jadvalida oʻzining eng yaqin taʼqibchisi Manchester Siti jamoasidan 7 ochko oʻzib ketdi. Bu haqda Goal.com xabar beradi.
Uchrashuvda Gabriel Jesus 42-daqiqada hisobni ochgan boʻlsa, tanaffusdan soʻng Noni Madueke oradagi farqni ikkitaga oshirdi. Mezbonlar safida Jean-Philippe Mateta bitta javob goli urgan boʻlsa-da, bu Arsenal bayramiga xalaqit bera olmadi. Oʻyindan soʻng futbolchilar murabbiy Mikel Artetani havoga otib, gʻalabani oʻzgacha ruhda nishonlashdi. Ispaniyalik mutaxassis ushbu muvaffaqiyatni uzoq kutilgan va mashaqqatli mehnat mahsuli ekanini taʼkidladi.
Ushbu tarixiy oʻyinda yana bir rekord oʻrnatildi. Mikel Arteta 16 yoshli Max Dowman jamoaning asosiy tarkibida maydonga tushirdi. Natijada Dowman 16 yosh-u 144 kunlik koʻrsatkich bilan Angliya Premer-ligasi tarixida asosiy tarkibda debyut qilgan eng yosh futbolchiga aylandi. Bu klubning kelajagi porloq ekanidan dalolat beradi.
Gʻalabaga qaramay, chempionlar safida yoʻqotish yuz berdi. Ikkinchi gol muallifi Noni Madueke oʻyin oxirida jarohat olib maydonni tark etdi. Endilikda u kelasi haftada boʻlib oʻtadigan Chempionlar ligasi finaliga qadar tiklanishga harakat qiladi. Arsenal muxlislari uchun bu 2003-04-yilgi "magʻlubiyatsiz mavsum"dan keyingi ilk chempionlik sifatida tarixda qoladi.
“Zamin”ni Telegramʻda oʻqing!
