Ikki yil avval Lauren Hempning Manchester Siti bilan shartnomasi yakunlanishiga oz qolganida, uning jamoani tark etishi haqiqatga yaqin edi. Barselona klubi Angliya terma jamoasi yulduzi bilan jiddiy qiziqayotgan edi va 17 yoshida klubga kelib, Yevropaning eng yaxshi vingerlaridan biriga aylangan futbolchini saqlab qolish uchun Manchester Siti jamoasida vaqt kam qolayotgan edi. Biroq yakunda Hemp qolishga qaror qildi va bugun u Ayollar Superligasi chempioni sifatida bu qaroridan juda baxtli ekanini ta’kidlamoqda. Bu haqda Goal.com xabar beradi.
Hemp 2018-yildan beri Manchester Siti safida to‘p surib kelmoqda. U jamoa bilan Angliya kubogi va Liga kubogini qo‘lga kiritgan bo‘lsa-da, bir necha bor chempionlik poygalarida mag‘lub bo‘lgan va Chempionlar ligasi bahslarini erta tark etishga majbur bo‘lgan edi. "Yangi shartnoma imzolash haqida o‘ylayotganimda, aynan shu klub bilan g‘alaba qozonishni xohlayotganimni bilardim. Oxirgi paytlarda sovrinlar kam bo‘lgani uchun xayolimda doim 'men g‘alaba qozonishim va sovrinlar yutishim kerak' degan fikr turardi", — deb eslaydi futbolchi.
Hemp o‘z jamoasiga ishonishda davom etdi: "Men klubga ishondim, shuning uchun ham qoldim. Chunki yaqin kelajakda biz raqobatlashib, sovrinlar yuta olishimizni bilardim". Shu oyning boshida ushbu orzu ushaldi va Manchester Siti 2016-yildan beri ilk bor Superliga chempionligini qo‘lga kiritdi. "Qarorimdan faxrlanaman. Qolganimdan va chempionlik uchun hamma qatori qattiq mehnat qilganimdan juda xursandman", — deya qo‘shimcha qildi u.
25 yoshli futbolchi bu muvaffaqiyatni shunchaki "boshlanishi" deb hisoblamoqda. Yakshanba kuni u jamoadoshlari bilan birgalikda olti yillik tanaffusdan so‘ng Angliya kubogini qo‘lga kiritish uchun Brayton jamoasiga qarshi maydonga tushadi. Hemp Uembli stadionidagi finallarda boy tajribaga ega va u Manchester Siti jamoasining yangi g‘alabalar davrini boshlab berishiga ishonmoqda.
“Zamin”ni Telegramʻda oʻqing!
