Bayer Leverkuzen klubining amaldagi sport direktori Simon Rolfes oʻz vaqtida Bavariya safiga qoʻshilishga juda yaqin kelgan. Bu haqda sobiq futbol agenti Lars-Vilhelm Baumgarten maʻlum qildi. Agentning soʻzlariga koʻra, muzokaralar yakuniy bosqichga yetgan va Rolfes Myunxenga koʻchib oʻtishga deyarli tayyor boʻlgan. Bu haqda Goal.com xabar beradi.
Oʻsha paytdagi Bavariya bosh murabbiyi Jupp Heynckes markaziy yarim himoyachini oʻz jamoasining asosiy figuralaridan biri sifatida koʻrgan va ushbu transfer amalga oshishi uchun qattiq harakat qilgan. Biroq, yakunda kutilmagan qaror tufayli kelishuv amalga oshmay qolgan.
Baumgartenning taʻkidlashicha, Simon Rolfes uchun hissiy bogʻliqlik va sport prinsiplari Germaniya rekordchisining jozibador moliyaviy taklifidan ustun kelgan. Futbolchi Leverkuzenda oʻzini juda baxtli his qilgan va jamoa sardorligidan voz kechishni istamagan.
Rolfes 2015-yilda faoliyatini yakunlaguniga qadar oʻn yil davomida Bayer sharafini himoya qildi va keyinchalik klub rahbariyatida ish boshladi. 2022-yildan buyon u sport direktori lavozimida faoliyat yuritib kelmoqda.
Qizigʻi shundaki, oʻtgan yilning sentyabr oyida Allianz Arena stadionida boʻlib oʻtgan oʻyinda Rolfes va Bavariya darvozaboni Sven Ulreich oʻrtasida nizo kelib chiqqan edi. Oʻshanda myunxenliklar posboni raqib direktori manziliga haqoratli soʻzlar ishlatgan edi.
“Zamin”ni Telegramʻda oʻqing!
