Shanba kuni Budapeshtdagi "Pushkash Arena"da boʻlib oʻtadigan Arsenal va PSJ oʻrtasidagi Chempionlar ligasi finali ikki xil uslubdagi jamoalar toʻqnashuviga aylanadi. Mikel Arteta shogirdlari musobaqadagi eng yaxshi himoya chizigʻiga ega boʻlib, hozirgacha bor-yoʻgʻi 6 ta gol oʻtkazib yuborgan va 9 ta oʻyinda darvozasi daxlsizligini saqlab qolgan. Biroq, ular Yevropa futboli tarixidagi eng iqtidorli hujumkor jamoalardan biri boʻlgan parijliklarni toʻxtata oladimi? Bu haqda Goal.com xabar beradi.
PSJ finalga qadar raqiblar darvozasini 44 bor ishgʻol qildi. Oʻtgan yili Myunxenda oʻtgan finalda Inter himoyasini parchalab tashlagan amaldagi chempionlar, hali ushbu turnirda gʻolib chiqmagan Arsenalga qarshi bahsda yaqqol favorit hisoblanadi. Shunga qaramay, Angliya Premer-ligasida 22 yillik tanaffusdan soʻng chempionlikni qoʻlga kiritgan "toʻpchilar" Vengriyaga yuqori kayfiyatda va bosimsiz tashrif buyurishadi.
Ushbu qiziqarli finalning eng muhim nuqtalaridan biri Bukayo Saka va Nuno Mendes oʻrtasidagi kurash boʻladi. Saka jarohatlar sababli mavsumni biroz sust oʻtkazgan boʻlsa-da, u toʻliq sport formasida boʻlganida Arsenalning hujumkor salohiyati butunlay oʻzgaradi. Uning qoʻrqmasligi va himoyadagi yordami Nuno Mendesning hujumkor harakatlarini cheklashda hal qiluvchi ahamiyatga ega.
Biroq, Mendes ayni damda dunyoning eng yaxshi chap qanot himoyachisi ekanligini Bavariya bilan yarim final bahslarida yana bir bor isbotladi. U dastlab Michael Olise tomonidan yaratilgan muammolarni bartaraf etib, javob oʻyinida raqibini butunlay zararsizlantirishga erishdi. Shanba oqshomida kimning ustun kelishi PSJning ikkinchi yoki Arsenalning ilk chempionligini belgilab beradi.
“Zamin”ni Telegramʻda oʻqing!
