PSJ hujumchisi Ousmane Dembele yaqinda olgan boldir jarohatiga qaramay, Arsenal jamoasiga qarshi boʻlib oʻtadigan Chempionlar ligasi finalida ishtirok etishga toʻliq tayyor ekanligini tasdiqladi. Fransiyalik futbolchi sogʻligʻini tiklab olgan, shuningdek, jamoaning hujumkor himoyachisi Achraf Hakimi ham Budapeshtdagi hal qiluvchi bahsda asosiy tarkibda maydonga tushishga ruxsat oldi. Bu haqda Goal.com xabar beradi.
Parijliklar ketma-ket ikkinchi marta qitʻa miqyosidagi finalga chiqish oldidan muhim xushxabar olishdi. Dembele 17-may kuni Parij klubiga qarshi oʻyinda jarohat olib, maydonni erta tark etganida muxlislarda xavotir uygʻotgan edi. Achraf Hakimi esa aprel oyi oxirida Bavariya bilan bahsda olingan son jarohatidan soʻng safga qaytdi. Har ikki futbolchi Puskas Arena sari yoʻl olishdan avval toʻliq mashgʻulotlarga qoʻshildi.
Matbuot anjumanida soʻzga chiqqan Dembele oʻz holati haqidagi shubhalarni rad etdi: “Finalni oʻtkazib yuborishdan hech qachon qoʻrqmaganman. Tayyorgarlik uchun oʻn-oʻn besh kun vaqtim bor edi. Hozir oʻzimni 100 foiz tayyor his qilyapman, butun jamoa ham jangga shay”. Shuningdek, u raqib haqida ham toʻxtalib, Arsenal jamoasining hujum va himoyadagi muvozanatini, ayniqsa, standart vaziyatlardagi xavfliligini alohida eʻtirof etdi.
Fransiyalik vinger Luis Enrique qoʻl ostida sovrinlar yutishga boʻlgan ishtiyoqi soʻnmaganini taʻkidladi. Murabbiy ham Achraf Hakimi oʻyinga tayyor ekanligini tasdiqlagan. Dembele PSJ safida masʻuliyati oshganini va asosiy maqsadi shaxsiy yutuqlar emas, balki klub bilan birga kuboklarni qoʻlga kiritish ekanligini qoʻshimcha qildi.
“Zamin”ni Telegramʻda oʻqing!
