O‘zbekistonning U23 bokschi qizlari Osiyo chempionatida porladi

Bugun boks bo‘yicha Osiyo chempionatida O‘zbekiston U23 ayollar terma jamoasining 6 nafar vakili ringga ko‘tarildi.

Kun yakunlariga ko‘ra, vakilarimiz 5 ta g‘alaba va 1 ta mag‘lubiyat qayd etdi. Ayniqsa, ikki bokschimiz raqiblarini texnik nokaut bilan mag‘lub etgani e’tiborga sazovor bo‘ldi.

Baxtiyorova mezbon vakilasiga imkoniyatni boy berdi

Kunning dastlabki bahsida -48 kg vazn toifasida Robiyaxon Baxtiyorova ringga chiqdi.

U mezbon Indoneziya vakilasi Linda Sariga qarshi murosasiz jang o‘tkazdi, ammo yakunda 2:3 hisobida imkoniyatni boy berdi.

G‘aniyeva ishonchli g‘alaba qozondi

-51 kg vazn toifasida Gulsevar G‘aniyeva filippinlik Xian Baguinga qarshi jang qildi.

Vakilamiz raqibiga hech qanday imkoniyat qoldirmadi va 5:0 hisobida ishonchli g‘alaba qozonib, keyingi bosqichga yo‘l oldi.

Yunusova va Ibrohimjonova texnik nokaut bilan yutishdi

-54 kg vaznda Uzukjamol Yunusova qirg‘izistonlik Milana Shixshabekovaga qarshi ringga ko‘tarildi.

Yunusova bahsni ikkinchi raundda texnik nokaut bilan yakunlab, kuchli tayyorgarligini namoyish etdi.

-60 kg vaznda Mushtariybonu Ibrohimjonova ham xuddi shunday natija qayd etdi. U Vetnam vakilasi Ti Nxung Quangni ikkinchi raundda texnik nokautga uchratdi.

Mamajonova va Xurramova ham keyingi bosqichda

-57 kg vaznda Xumorabonu Mamajonova mezbon Nurul Izzaga qarshi jang qildi.

O‘zbekistonlik bokschi raqibini 5:0 hisobida mag‘lub etib, keyingi bosqichga yo‘llanma oldi.

Kunning yana bir muvaffaqiyatli jangini -65 kg vaznda Sevinch Xurramova o‘tkazdi. U qozog‘istonlik Arujan Jangabayevani 4:0 hisobida yengdi.

Kun natijasi: 5 g‘alaba, 1 mag‘lubiyat

O‘zbekiston U23 bokschi qizlarining bugungi natijalari:

• Robiyaxon Baxtiyorova — Linda Sari 2:3;

• Gulsevar G‘aniyeva — Xian Baguin 5:0;

• Uzukjamol Yunusova — Milana Shixshabekova, texnik nokaut;

• Xumorabonu Mamajonova — Nurul Izza 5:0;

• Mushtariybonu Ibrohimjonova — Ti Nxung Quang, texnik nokaut;

• Sevinch Xurramova — Arujan Jangabayeva 4:0.

Bu haqda O‘zbekiston Boks federatsiyasi xabar berdi. Terma jamoamiz qizlari Osiyo ringida navbatdagi muhim g‘alabalar sari ishonchli qadam tashladi.