Arveladze Masharipovning Saudiya klubiga o‘tishi, jamoaga yana bir legioner kelishi mumkinligi haqida

O‘zbekiston kubogi yarim finalidan o‘rin olgan "Qo‘qon-1912" - "Paxtakor" uchrashuvidan so‘ng mehmonlar ustozi Shota Arveladze o‘z fikrlari bilan o‘rtoqlashdi. Bu haqda qo‘qonliklar matbuot xizmati xabar berdi.

- Avvalo shuni aytishim joizki, yarim final uchrashuvlariga mavsumda barqaror o‘ynagan va barcha qiyinchiliklarni yengib o‘tgan jamoalar yetib kelishdi. Sinovlar mavsumida bizdan tashqari, “Nasaf”, AGMK va “Qo‘qon-1912” yaxshi o‘yin namoyish etdi.

Bugungi uchrashuv haqida aytadigan bo‘lsam, bunday maydonda o‘z o‘yinimizni ko‘rsata olmadik. Shunday bo‘lsa-da, shogirdlarimga minnatdorchilik bildiraman. G‘alaba bilan futbolchilarimizni tabriklayman. O‘yinga juda yaxshi hozirlandik. Maydon biz xohlaydigan futbolni namoyish etishga imkon bermasligini bilardik. Futbolchilarga rahmat, ular bor kuchlarini berishdi, keskin bellashuvda yirik hisobda g‘alaba qozondik. Ko‘plab vaziyatlar yuzaga keltirdik, raqibga deyarli imkoniyat bermadik. Finalga yo‘l oldik, yutuqqa haqli edik. Mezbonlarga esa sog‘liq, yaxshi hordiq chiqarib, keyingi mavsumga yaxshi tayyorgarlik ko‘rishlarini tilab qolaman.

Kubok bahslarini bashorat qilish mushkul. Futbolda shunday vaziyatlar bo‘ladiki, masalan Gruziya kubogining finalida quyi liganing ikkita jamoasi maydonga tushdi. Birozdan keyin boshlanadigan AGMK - "Nasaf" o‘yinini maroq bilan ko‘rishga harakat qilaman. Har ikki jamoa ham finalga loyiq.

Gruziyadan yana futbolchilar olib kelish mumkin. Buning uchun izlanish kerak. Futbolda har doim iqtidorlarni topish mumkin. O‘z mamlakatingdan futbolchi olib kelishda juda ehtiyotkor bo‘lish talab etiladi. Sen olib keladigan o‘yinchi boshqa futbolchilardan ustun bo‘lishi lozim.

Masharipovni Saudiya klubiga o‘tishi borasida nima deyishim mumkin? Jalolidinni "Paxtakor" bilan yana bir yillik shartnomasi bor, - dedi Arveladze. “Zamin” yangiliklarini “Youtube”da kuzatib boring