Ilon Mask suddagi so'roq paytida OpenAI kompaniyasini tijorat tashkilotiga aylantirish bo'yicha dastlabki muhokamalardan xabardor bo'lganini, biroq Sem Altman kompaniya notijorat bo'lib qolishiga ishontirganini aytdi. Bu haqda Ixbt.com xabar beradi.
Mask OpenAI, uning hammuassisi Sem Altman va prezident Greg Brokmanga qarshi sudga murojaat qilib, ular xavfsiz sun'iy intellekt yaratish va'dasi bilan undan 38 million dollar olganini, keyin esa o'z boyliklarini oshirish uchun tijorat tuzilmasiga o'tganini da'vo qilmoqda.
OpenAI yuristining 2017 yil 31-avgustda Altman yuborgan kelishuvni o'qiganmisiz degan savoliga Mask: «Men mayda shriftni o'qimadim, faqat sarlavhani o'qidim», deb javob berdi. Mask kompaniya boshqaruvida o'zgarishlar va 150 milliard dollar tovon puli talab qilmoqda.
OpenAI vakillari Maskning harakatlarini kompaniyani nazorat qilish istagi va 2018-yilda direktorlar kengashidan ketganidan keyingi muvaffaqiyatlarga hasad qilish bilan izohlamoqda. Shuningdek, Mask o'zining xAI kompaniyasini rivojlantirishga urinayotgani aytilmoqda.
Mask sudda uning xAI kompaniyasi o'z modellarini o'rgatish uchun OpenAI'dan foydalanishini tasdiqlab, bu standart amaliyot ekanini ta'kidladi.
“Zamin”ni Telegramʻda oʻqing!
