Meta kompaniyasi bosh direktori Mark Sukerberg rejalashtirilgan qisqartirishlarni sun'iy intellektga kiritilayotgan sarmoyalar bilan izohladi. U kelgusida yana ishdan bo'shatishlar bo'lishi mumkinligini inkor etmadi. Bu haqda Ixbt.com xabar beradi.
«Kompaniyada ikkita asosiy xarajat markazi bor: hisoblash infratuzilmasi va xodimlar. Agar biz bir yo'nalishga ko'proq mablag' kiritsak, boshqa yo'nalishlar uchun sarmoya kamayadi», — dedi Sukerberg.
Uning so'zlariga ko'ra, xodimlarni qisqartirish Meta jamoalarining sun'iy intellektga yo'naltirilgan yangi tuzilmasi bilan bog'liq emas. Barcha xodimlarni sun'iy intellekt vositalaridan foydalanishga jalb qilish ishdan bo'shatishlarga olib kelmaydi.
Meta kompaniyasi 20 may kuni xodimlarining qariyb 10 foizini ishdan bo'shatishni niyat qilgan. Yilning ikkinchi yarmida qo'shimcha qisqartirishlar rejalashtirilgan.
«Kelgusi uch yil ichida voqealar qanday rivojlanishini oldindan ko'rish imkonini beruvchi sehrli sharim borligini aytishni xohlardim. Ammo u menda yo'q», — deya ta'kidladi kompaniya rahbari.
“Zamin”ni Telegramʻda oʻqing!
