"SoftBank" ma'lumotlar markazlarini qurish uchun robotlar loyihasini 100 mlrd dollarga baholadi

Yaponiyaning "SoftBank" konglomerati "Roze AI" nomli yangi korxonani ishga tushirishni rejalashtirmoqda. Startap AQShda server fermalarini qurishni tezlashtirish va arzonlashtirish uchun avtonom robotlardan foydalanishga qaratilgan. Bu haqda Ixbt.com xabar beradi.

Uning birjaga chiqishdagi bahosi 100 milliard dollarni tashkil qilishi mumkin.

"Financial Times" nashriga ko'ra, "SoftBank" "Roze AI" kompaniyasini 2026-yilning ikkinchi yarmida o'tkazilishi kutilayotgan dastlabki ommaviy taklifga (IPO) tayyorlashni boshladi. Loyihaning asosiy g'oyasi jismoniy infratuzilma yetishmovchiligi muammosini hal qilishdan iborat.

An'anaviy qurilish brigadalari o'rniga robotlar payvandlash, konstruksiyalarni yig'ish va og'ir yuklarni tashish bilan shug'ullanadi. Bu esa data-markazlarni kechayu kunduz qurish imkonini beradi.

"Wall Street Journal" ma'lumotlariga ko'ra, yangi kompaniya tarkibiga "SoftBank" so'nggi oylarda sotib olgan aktivlar kirishi mumkin. Ular orasida "ABB" robototexnika bo'linmasi va "Ampere Computing" chiplar ishlab chiqaruvchisi bor.

Ushbu quvvatlarni yagona ekotizimga birlashtirish orqali "SoftBank" asoschisi Masayoshi Son Amerika bozorida rekord darajadagi 100 milliard dollarlik bahoni oqlashga umid qilmoqda.

Og'ir sanoatni avtomatlashtirish tendensiyasi tobora ommalashmoqda. "Amazon" asoschisi Jeff Bezos ham shunga o'xshash qadamlarni tashlamoqda.

Uning 6,2 milliard dollar sarmoya bilan ishga tushirilgan "Project Prometheus" startapi ham sanoat sektorini modernizatsiya qilishga qaratilgan.

Biroq "SoftBank" tahlilchilari loyihaga shubha bilan qaramoqda. 2023-yilda "Zume" robo-pitseriyasining inqirozi investorlarni ehtiyotkorlikka chorlamoqda.

Hali tayyor mahsulotni taqdim etmagan kompaniyaning bunday qisqa muddatli IPO rejalari va yuqori baholanishi xavotir uyg'otmoqda.