PayPal kompaniyasi aksiyalar narxining tushishi va kutilayotgan qisqartirishlarga qaramay, kelajakka umid bilan qaramoqda. Kompaniya bosh direktori Enrike Lores investorlar oldidagi hisobotida PayPal yana «texnologik kompaniyaga aylanishi» kerakligini taʼkidladi. Bu oʻzgarishlar sunʼiy intellekt (AI) texnologiyalarini biznes jarayonlariga faol tatbiq etishni nazarda tutadi. Bu haqda Techcrunch.com xabar beradi.
Loresning soʻzlariga koʻra, kompaniya oʻz texnologik platformasini modernizatsiya qilish, «cloud-native» tizimiga oʻtish va dasturiy taʼminotni ishlab chiqish jarayonlarida sunʼiy intellektdan agressiv foydalanishni rejalashtirmoqda. Bu qadamlar dasturchilar unumdorligini oshirish va mahsulotlarni bozorga chiqarish muddatini qisqartirishga xizmat qiladi.
Kompaniya doirasida «AI transformatsiyasi va soddalashtirish» boʻyicha yangi guruh tuzildi. Ushbu strategiya, shuningdek, tashkiliy tuzilmani optimallashtirish bilan birgalikda, kelgusi ikki-uch yil ichida 1,5 milliard dollardan ortiq mablagʻni tejash imkonini berishi kutilmoqda. PayPal xarajatlarni kamaytirish maqsadida ish oʻrinlarini qisqartirishni ham koʻzda tutgan.
Sunʼiy intellekt faqat kod yozish bilan cheklanib qolmaydi. PayPal uni mijozlarga xizmat koʻrsatish, qoʻllab-quvvatlash operatsiyalari va xavflarni boshqarish kabi muhim yoʻnalishlarda ham qoʻllamoqchi. Loresning taʼkidlashicha, bu shunchaki texnologik tajriba emas, balki kompaniyaning asosiy biznes jarayonlarini tubdan qayta loyihalashdir.
“Zamin”ni Telegramʻda oʻqing!
