Rossiya hukumati fuqarolarga boshqa hududga ko‘chib o‘tganda o‘z mobil telefon raqamini saqlab qolish huquqini beruvchi qarorni tasdiqladi. Ushbu yangilik 1-sentabrdan kuchga kiradi va abonentlarga yashash joyini o‘zgartirganda raqamni yo‘qotmaslik imkonini beradi. Bu haqda Ixbt.com xabar beradi.
Raqamni saqlab qolish uchun aloqa operatoriga tegishli ariza bilan murojaat qilish kifoya. Arizani shaxsan yoki masofaviy tarzda — operatorning rasmiy sayti, ko‘chirilgan raqamlar bazasi operatori portali yoki Rossiyaning «Gosuslugi» davlat xizmatlari portali orqali yuborish mumkin.
Hozirgi vaqtda boshqa shaharga ko‘chganda raqam saqlanib qolsa-da, abonent eski tarif rejasidan foydalanishda davom etadi. Bu esa yangi hududdagi abonentlarga qo‘ng‘iroq qilish xarajatlarini sezilarli darajada oshirib yuborishi mumkin edi.
Yangi qoidaga ko‘ra, endilikda operatorni o‘zgartirganda ham raqamni saqlab qolish imkoniyati taqdim etiladi. Ushbu o‘zgarish 2035-yilgacha aloqa tarmog‘ini rivojlantirish strategiyasi doirasida amalga oshirilmoqda.
Hukumat vakillarining ta’kidlashicha, ushbu qadam aloqa xizmatlarini yanada qulay va moslashuvchan qilishga xizmat qiladi. Shuningdek, bu sohadagi raqobatni kuchaytirish va abonentlar uchun qulay muhit yaratishga yordam beradi.
“Zamin”ni Telegramʻda oʻqing!
