Rossiyaning "Kosmos 2581" va "Kosmos 2583" sunʼiy yoʻldoshlari orbitada oʻta aniq yaqinlashish manyovrini bajardi. COMSPOC kosmik obyektlarni kuzatish kompaniyasi maʼlumotlariga koʻra, 28-aprel kuni ushbu qurilmalar bir-biridan atigi 3 metr masofagacha yaqinlashgan. Mutaxassislar bu harakat tasodifiy emasligini va sunʼiy yoʻldoshlar barqaror konfiguratsiyani saqlash uchun bir necha bor tuzatishlar kiritganini taʼkidlamoqda. Bu haqda Ixbt.com xabar beradi.
Tahlillar shuni koʻrsatdiki, operatsiyada nafaqat ushbu juftlik, balki "Kosmos 2582" sunʼiy yoʻldoshi hamda "Kosmos 2583"dan ajralib chiqqan Object F nomli kubsat ham ishtirok etgan. Barcha obyektlar 2025-yil fevral oyida "Soyuz" raketasi yordamida koinotga uchirilgan edi. COMSPOC kuzatuvlariga koʻra, bu qurilmalar past Yer orbitasida oʻzaro muvofiqlashtirilgan manyovrlarni birinchi marta amalga oshirayotgani yoʻq.
Yaqinlashish jarayonida "Kosmos 2582" guruhdan 100 kilometrdan kamroq masofada ortda qolgan boʻlsa, Object F qurilmasi "Kosmos 2582"dan 15 km va "Kosmos 2581"dan 10 km uzoqlikda harakatlangan. Mutaxassislarning fikricha, Rossiya ushbu operatsiyalar orqali bir vaqtning oʻzida bir nechta obyektni boshqarish va ularning oʻzaro oʻzaro taʼsirini taʼminlash boʻyicha ilgʻor orbital texnologiyalarni sinovdan oʻtkazmoqda.
“Zamin”ni Telegramʻda oʻqing!
