AMD kompaniyasi Instinct MI400 turkumiga kiruvchi yangi Instinct MI430X grafik tezlatgichining dastlabki versiyasini taqdim etdi. IT Home nashrining qayd etishicha, ushbu grafik protsessor allaqachon bir qator superkompyuterlar uchun e'lon qilingan. Bu haqda Ixbt.com xabar beradi.
Katta hajmdagi sun'iy intellekt modellarini o'qitish va optimallashtirish uchun mo'ljallangan MI455X modelidan farqli o'laroq, MI430X ham sun'iy intellekt vazifalari, ham an'anaviy yuqori unumdorlikdagi hisob-kitoblar (HPC) uchun moslashtirilgan. Ushbu farq MI430X'ning FP64 yuqori aniqlikdagi ma'lumotlar formatini qo'llab-quvvatlashida yaqqol namoyon bo'ladi.
AMD ma'lumotlariga ko'ra, MI430X'ning FP64 rejimidagi hisoblash quvvati 200 TFLOPs'dan oshishi kutilmoqda. Bu ko'rsatkich Nvidia'ning Rubin arxitekturasiga nisbatan olti barobar yuqori bo'lib, uni tarixda FP64 rejimida ishlovchi eng kuchli grafik protsessorga aylantiradi.
Kompaniya vakillarining ta'kidlashicha, hisoblash aniqligi iqlimshunoslik, materialshunoslik, yadro fizikasi va suyuqliklar mexanikasi kabi sohalar uchun hal qiluvchi ahamiyatga ega. Aynan FP64 kabi yuqori aniqlikdagi ma'lumotlar sun'iy intellektga asoslangan ilmiy tadqiqotlar uchun mustahkam poydevor bo'lib xizmat qiladi.
“Zamin”ni Telegramʻda oʻqing!
