MIT qoshida tashkil etilgan PolyJoule kompaniyasi yangi avlod «o‘z-o‘zidan o‘chadigan» akkumulyatorlarini taqdim etdi. Sinovlar davomida batareya elementi 2000°C haroratli propan gorelkasi bilan qizdirildi. Olov o‘chirilgach, akkumulyator portlamadi va yonishda davom etmadi, bu esa texnologiyaning yuqori xavfsizlik darajasini ko‘rsatdi. Bu haqda Ixbt.com xabar beradi.
An’anaviy litiy-ionli batareyalardan farqli o‘laroq, PolyJoule mahsulotida litiy, nikel va kobalt kabi reaktiv metallar ishlatilmaydi. Buning o‘rniga organik kimyo, ya’ni o‘tkazuvchan polimer katod va tuz asosidagi suyuq elektrolit qo‘llaniladi. Bu yondashuv yong‘in xavfini keskin kamaytiradi va batareya elementlari o‘rtasida olov tarqalishining oldini oladi.
Yangi texnologiya nafaqat xavfsizlik, balki yuqori unumdorlikni ham ta’minlaydi. Birinchi avlod akkumulyatorlariga nisbatan energiya zichligi o‘n barobarga oshgan, resursi esa 10 mingdan ortiq quvvatlash va quvvatni uzatish siklini tashkil etadi. Shuningdek, murakkab sovutish tizimlariga bo‘lgan ehtiyojning yo‘qligi ishlab chiqarishni arzonlashtiradi.
PolyJoule ushbu ishlanmani asosan quyosh elektr stansiyalari, sanoat obyektlari va zaxira energiya ta’minoti kabi statsionar tizimlar uchun mo‘ljallamoqda. Kompaniya joriy yildayoq integratorlar va montaj kompaniyalaridan buyurtmalar qabul qilishni boshlashni rejalashtirmoqda.
“Zamin”ni Telegramʻda oʻqing!
