Litiy oʻrnini bosuvchi texnologiya: Xitoyda suyuq sinkli akkumulyator sinovdan oʻtkazildi

Xitoylik olimlar energetika sohasida inqilobiy yangilik boʻlishi kutilayotgan, suyuq sink asosida ishlaydigan yangi turdagi protochli batareyani muvaffaqiyatli sinovdan oʻtkazishdi. Ushbu akkumulyator yetti oydan ortiq vaqt davomida toʻxtovsiz ishlashga qodirligini isbotladi. Tadqiqotchilarning fikricha, yangi texnologiya quyosh va shamol elektr stansiyalari uchun yirik energiya saqlash tizimlarining istiqbolli asosi boʻlishi mumkin. Bu haqda Ixbt.com xabar beradi.

Fudan universiteti va Xitoy fanlar akademiyasi mutaxassislari tomonidan taqdim etilgan ushbu ishlanma anʼanaviy batareyalardan tubdan farq qiladi. ixbt.com maʼlumotiga koʻra, eksperimental akkumulyator sinovlar davomida 5128 soat (taxminan 214 kun) davomida uzluksiz ishlagan. Bu koʻrsatkich qayta tiklanadigan energiya manbalari uchun barqaror va uzoq muddatli yechim izlayotgan soha vakillari uchun juda muhimdir.

Suyuq energiya tashuvchi mexanizmi

Anʼanaviy sink akkumulyatorlarida qoʻzgʻalmas metall elektroddan foydalanilsa, yangi tizimda sink nanozarralaridan iborat suyuq suspenziya qoʻllaniladi. Ushbu suyuqlik rezervuar va elektrokimyoviy yacheyka oʻrtasida doimiy ravishda aylanib turadi. Bunda sink shunchaki elektrod emas, balki oʻziga xos "suyuq energiya tashuvchi" vazifasini bajaradi.

Zaryadlash va zaryadsizlanish jarayonida sink zarralari koʻp marotaba metall holatidan ion holatiga va aksincha oʻtib, batareyaning barqaror ishlashini taʼminlaydi. Texnologiyaning asosi maxsus suspenziya konstruksiyasidir: u sink nanozarralari, gʻovakli uglerod karkasi va organik ligandli elektrolitni oʻz ichiga oladi. Bunday tarkib zarralarning bir-biriga yopishib qolishining oldini oladi va minglab sikllardan keyin ham samaradorlikni saqlab qoladi.

Masshtablashtirish va kelajak istiqbollari

Yangi konstruksiyaning eng katta afzalliklaridan biri — uni osonlik bilan kengaytirish imkoniyatidir. Oddiy akkumulyatorlarda sigʻimni oshirish uchun yirikroq elementlar yasash talab etilsa, bu yerda shunchaki sink suspenziyasi saqlanadigan rezervuarlar hajmini kattalashtirish kifoya. Bu xususiyat texnologiyani umummilliy energiya tizimlari uchun juda jozibador qiladi.

Sinov natijalariga koʻra, batareya 99,94 foizli kulon samaradorligini koʻrsatdi. Marganets dioksidi asosidagi katodga ega versiya esa 5500 marta zaryadlash-zaryadsizlanish siklidan soʻng ham oʻzining dastlabki sigʻimining 81,1 foizini saqlab qolgan. Bu koʻp yillik xizmat muddatidan dalolat beradi.

Loyiha rahbari Fey Vanning soʻzlariga koʻra, ushbu gʻoya sinkni elektrolitik usulda ishlab chiqarish korxonasiga tashrif buyurganida paydo boʻlgan. Olim metall ionlarini qayta tiklash jarayonidan nafaqat metallurgiyada, balki elektr energiyasini saqlashda ham foydalanish mumkinligini anglab yetgan. Navbatdagi bosqichda tadqiqotchilar texnologiyani sanoat miqyosiga moslashtirish va boshqa metallar asosida shunday akkumulyatorlar yaratish ustida ish olib borishadi.