Raqamli texnologiyalar va sunʼiy intellekt hukmron boʻlgan davrda analog fotosuratlar va retro uslubdagi kameralar oʻzining jozibasi hamda nostalgiya hissini uygʻotishi bilan ommalashib bormoqda. Fujifilm kompaniyasining 175 dollarlik Instax Wide 400 modeli aynan shu anʼanani davom ettirib, foydalanuvchilarga keng formatdagi tasvirlarni taqdim etadi. Ushbu kamera guruhli suratlar, manzaralar va koʻproq tafsilotlarni qamrab olishni istaganlar uchun ayni muddaodir. Bu haqda Techcrunch.com xabar beradi.
Qurilma 62 × 99 mm oʻlchamdagi suratlarni chiqaradi, bu Instax Mini fotosuratlaridan ikki barobar kattaroqdir. Kamera juda sodda tuzilishga ega: unda murakkab sozlamalar yoʻq, barcha jarayonlar, jumladan, chaqnoq (flash) va fokus avtomatik tarzda boshqariladi. Foydalanuvchidan faqat kadrni toʻgʻri tanlash va tugmani bosish talab etiladi, xolos.
Kamerani yoqish uchun obyektivni soat miliga teskari yoʻnalishda burish kifoya. Birinchi bosqichda yaqin masofadagi obyektlar uchun fokus rejimi, ikkinchisida esa uzoq manzaralar uchun landshaft rejimi faollashadi. Obyektivni soat mili yoʻnalishida burish esa kamerani oʻchiradi. Shuningdek, toʻplamda yaqin masofadan suratga olish sifatini yaxshilaydigan maxsus obyektiv qoʻshimchasi ham mavjud.
Tasvir sifati yorugʻlik yetarli boʻlgan sharoitda juda yaxshi natija beradi, ranglar yorqin va aniq chiqadi. Biroq, murakkab yorugʻlik sharoitlarida, masalan, yorugʻ osmon fonidagi qorongʻu daraxtlar kabi kontrast yuqori boʻlgan holatlarda detallar biroz xiralashishi mumkin. Shunga qaramay, Instax Wide 400 oʻzining soddaligi va qulayligi bilan lahzali fotosurat ixlosmandlari uchun ajoyib tanlov boʻlib qolmoqda.
“Zamin”ni Telegramʻda oʻqing!
