MIT elektronika laboratoriyasi olimlari kremniy fotonikasi sohasida muhim yutuqqa erishdilar. Ular o‘nlab yillar davomida LiDAR tizimlarini rivojlantirishga to‘sqinlik qilib kelgan fundamental muammoni hal qilib, optik fazali antenna panjarasini (OFAR) yaratdilar. Yangi texnologiya keng ko‘rish burchagi va yuqori aniqlikni birlashtirib, tasvirdagi shovqinlarni bartaraf etish imkonini beradi. Bu haqda Ixbt.com xabar beradi.
An’anaviy tizimlarda antennalar orasidagi masofa juda yaqin bo‘lganda, yorug‘lik bir to‘lqin uzatgichdan ikkinchisiga o‘tib ketishi (evanescent coupling) kuzatilgan. MIT jamoasi bu muammoni hal qilish uchun geometrik «detuning» usulini qo‘lladi. Ular turli kenglikdagi (550, 600 va 650 nanometr) uch xil turdagi antennalardan foydalanib, qo‘shni kanallar o‘rtasidagi o‘zaro ta’sirni to‘liq to‘xtatishga muvaffaq bo‘lishdi.
Tadqiqotchilar diffraksion panjaralarni aniq optimallashtirish orqali barcha antennalar bir xil burchak ostida va bir xil kuch bilan yorug‘lik taratishini ta’minladilar. AIM Photonics platformasida o‘tkazilgan sinovlar shovqin darajasi 100 barobarga kamayganini ko‘rsatdi. 16 kanalli chip 60 darajali sektorda faol skanerlashni amalga oshirib, yuqori samaradorlikni namoyish etdi.
Ushbu kashfiyot ixcham, arzon va yuqori ishonchli LiDAR datchiklarini ommaviy ishlab chiqarish yo‘lini ochadi. Kelajakda ushbu texnologiya smartfonlar, avtonom boshqaruv tizimlari va kengaytirilgan reallik (AR) qurilmalariga integratsiya qilinishi kutilmoqda. Bu yutuq optik ko‘rish tizimlarining masshtabli tatbiq etilishidagi asosiy to‘siqlardan birini olib tashladi.
“Zamin”ni Telegramʻda oʻqing!
