Tayvanlik chip ishlab chiqaruvchi TSMC kompaniyasi o‘zining ishlab chiqarish quvvatlarini keng ko‘lamli qayta jihozlash jarayonini boshladi. Kompaniya nafaqat Tayvandagi zavodlarini modernizatsiya qilmoqda, balki Germaniyaning Drezden shahrida qurilayotgan yangi ESMC zavodini ta’minlash uchun ham tayyorgarlik ko‘rmoqda. Bu haqda Ixbt.com xabar beradi.
Asosiy o‘zgarishlar Tayvandagi Fab 15 zavodida amalga oshiriladi. Fab 15B bo‘linmasi N7+/N5 texnologiyasidan zamonaviyroq N3 texnologiyasiga o‘tkaziladi. Bu jarayon mavjud EUV tizimlari tufayli nisbatan oson kechadi.
Fab 15A zavodida esa yanada jiddiy o‘zgarishlar kutilmoqda. Hozirda 22–28 nm texnologiyasi bo‘yicha chiplar ishlab chiqarayotgan DUV uskunalari o‘rniga N4 texnologiyasiga o‘tish rejalashtirilgan. Aynan shu eski avlod uskunalari Germaniyaga yuboriladi.
Germaniyadagi ESMC zavodi asosan avtomobilsozlik sanoati uchun zarur bo‘lgan chiplarni ishlab chiqarishga ixtisoslashadi. Ushbu loyihani amalga oshirish uchun TSMC taxminan 3,2 milliard dollar sarmoya kiritmoqda.
Drezdendagi zavod 2027-yil oxiriga qadar to‘liq ishga tushishi kerak. Shu sababli, uskunalarni yetkazib berish va o‘rnatish ishlari yaqin oylarda boshlanishi rejalashtirilgan.
“Zamin”ni Telegramʻda oʻqing!
