Meta kompaniyasi Instagram Direct shaxsiy xabarlarida qo‘llaniladigan E2EE (skvoznoe shifrlash) texnologiyasini o‘chirib tashladi. Ilgari ushbu funksiyani «maxfiylikning oltin standarti» deb atagan kompaniya, endilikda xodimlar foydalanuvchilarning matnli xabarlari, fotosuratlari va videolariga kirish imkoniyatiga ega bo‘lishini tasdiqladi. Bu haqda Ixbt.com xabar beradi.
2019-yildan buyon «maxfiy kelajak» sari qadam tashlab, Facebook Messenger va Instagram'da shifrlashni joriy etgan Meta, kutilmaganda ushbu siyosatdan qaytdi. Kompaniya vakillarining ta’kidlashicha, ushbu funksiyaga foydalanuvchilar tomonidan talab past bo‘lgan, shu sababli uni majburiy qilishdan voz kechilgan.
Tanqidchilar esa bu qaror ortida boshqa maqsadlar yashiringan bo‘lishi mumkinligini taxmin qilmoqda. Xususan, xabarlarga kirish imkoniyati Meta'ga reklama tizimlarini takomillashtirish va sun’iy intellekt mahsulotlarini rivojlantirish uchun qimmatli ma’lumotlar bazasini taqdim etadi. Kompaniya esa xabarlar neyrotarmoqlarni o‘qitish uchun ishlatilmasligini da’vo qilmoqda.
Ushbu o‘zgarish jamoatchilikda turlicha qarshi olindi. Bolalar huquqlarini himoya qiluvchi tashkilotlar shifrlashning yo‘qligi noqonuniy xatti-harakatlarni aniqlashni osonlashtirishini ta’kidlab, qarorni qo‘llab-quvvatladi. Raqamli maxfiylik tarafdorlari esa buni xavfsizlik standartlaridan chekinish va foydalanuvchilar ishonchiga putur yetkazuvchi xavfli signal deb baholamoqda.
“Zamin”ni Telegramʻda oʻqing!
